Un novo libro de Carlos López

 

Carlos López é moitas veces parella artística de Pinto, en Pinto&Chinto, como sucede nas obras: Suca, Contos para nenos que dormen deseguida, Minimalario, Nicomedes o Pelado, As estrambóticas aventuras do barón de Münchaussen, A estrambótica illa do tesouro, O estrambótico Principiño, Os oficios de Rus, Os xogos olímpicos de Ningures, As estrambóticas viaxes de Gulliver, A maceira que daba calquera cousa menos mazás, O pequeno da familia fantasma,...

Agora non, agora, preséntanos Bichería ilustrador por Xan López Domínguez, no estilo característico deste ilustrador pero levando un pouco máis ao extremo esa estilización das figuras ata obrigar a facer un esforzo para recoñecelas. Un estilo que se vai depurando, adoptando o mínimo de cores e unha síntese de elementos e liñas en evolución constante. Os textos son breves, moi breves e concisos, nos que se lle dá unha volta  máis ao mundo animal collendo as súas características e xogando con elas, levando o relato ao absurdo... O certo é que ningunha nena ou ningún neno se vai aburrir lendo estas pequenas historias e recuperando aos seus protagonistas, porque como ben se di na presentación editorial son pequenos en palabras pero grandes en humor e tenrura e esta é unha aventura BESTIAL.

Varios libros, varias idades lectoras, varias editoriais...

A tartaruga Amodovou de Paula Carballeira con ilustracións de Ana Seixas, publicado por oqueleo. Un libro cheo de cores para primeiros lectores e lectoras.Como camiñará unha tartaruga que leva ese nome? Dende que nace a tartaruga vive rodeada de aves que lle avisan dos perigos ou que a axudan a voar ata colocarse sobre unha balea para que coñeza o mar dende dentro. Unha tartaruga feliz nun mundo en primavera. Porque amodiño tamén se fai o camiño.

A formiga destemida de María Reimóndez, ilustrado por Iván Sende e publicado por Xerais na colección Pequeno Merlín. Unha formiga coma as demais, ou non tanto "Porque ela, de cando en vez, despístase. E hoxe sentía no corpo esa necesidade. A necesidade de levantar un chisquiño a cabeza. Un chisquiño nada máis... " Lese na presentación editorial "Unha fábula sobre a ansia de coñecemento e sobre a importancia de afrontar a vida sen prexuízos que nos limiten". Semella que as formigas saen das fábulas, andar arredor delas.

O mundo máxico de Lía de Eduardo Santiago con ilustracións de Marcos Calo, publicado na colección Merlín de Xerais. Unha nena de dez anos. Unha nai que a considera moi madura, un pai que se burla dela, a xente que pensa que é muda... pero hai un ámbito subterráneo detrás dese comportamento, uns medos e unha necesidade de salvar a alguén máis que a ela. Todo iso a levará a unha viaxe na que atravesará o mundo subterráneo sobre o que flúe a cidade de Pontevedra na noite, e na compañía dun trasno como única axuda, conseguirá o que se propón: volver á casa onde xa non está a violencia de xénero abrouxando o seu universo.  

A historia de Greta. (Non es demasiado pequeno para facer cousas grandes. A biografía non oficial de Greta Thunberg). Escrito por Valentina Camerini, ilustrado por Verónica Carratello, teaducido por Moisés Barcia e publicado por Sushi Books. Había que contar nun libro para rapazada a historia de Greta, a adolescente sueca que comezou unha folga polo clima ela soa cando contaba quince anos, a rapaza que semella malhumorada cando lles fala aos dirixentes políticos, a moza que espertou un movemento necesario e nos puxo a seguila nas súas viaxes e encontros nos cumios mundiais. Nunca tal se vira. Todos os medios de comunicación recollían a noticia, repetían as súas palabras e demostraban que as rapazas diferentes son imprescindibles sempre pero neste caso máis. 

Unha historia que comeza o 20 de agosto de 2018 e aínda non rematou porque a rapazada, a mocidade vaise ter que poñer en pé para defender a Terra que están herdando ou non haberá planeta, e non hai un plan B para este asunto. No libro cóntasenos esta historia pero tamén se amplía para explicarnos "Que podemos facer nós?", para engadir un glosario medio ambiental, unha cronoloxía da contaminación humana e o quecemento global e un listado de enlaces a páxinas web onde continuar afondando nesta temática.   

Porque hai camiños que é preciso facer, sexas tartaruga, formiga ou nena. Porque é preciso loitar pola vida, defender as ansias de saber, salvarnos dos monstros que adoptaron formas humanas e protexer o planeta. Por todo iso, é preciso ler.