mércores, 25 de xaneiro de 2017

Os autores máis lidos nos clubs de lecturas

Aí van... desde o blogue Ler en mancomún da Asesoría de Bibliotecas Escolares. Este é o resultado da revisión das memorias dos 239 Clubs de Lectura acollidos á convocatoria realizada pola Dirección xeral de Centros e Recursos Humanos da Consellería de Cultura, Educación e Ordenación Universitaria. Clubs de Lectura de centros que escolarizan alumnado de Secundaria.
E din: "Agustín Fernández Paz lidera unha vez máis esta táboa na que tamén atopamos poetas ou autores de banda deseñada. Observamos, así mesmo, que son 13 as autoras que aparecen nesta relación dos 40 autores/as máis lidos, con obras seleccionadas polos lectores e lectoras". Xénero (ou sexo dos creadores/as) e xéneros (literarios: poesía, teatro, narrativa, banda deseñada...).  Agustín é seguido por Ledicia Costas, o viñetista e ilustrador  Miguelanxo PradoPedro Feijoo, ... 

martes, 24 de xaneiro de 2017

Os libros máis lidos nos Clubs de Lectura


Do blogger Ler en mancomún, que mantén a Asesoría de Bibliotecas Escolares en relación aos Clubs de Lectura, extraemos a información, acerca dos cincuenta libros máis lidos nestes 239 clubs de centros de Secundaria acollidos á convocatoria.
Dos galegos, destacan Escarlatina, a cociñeira defunta, O corazón de Xúpiter e Un animal chamado néboa de Ledicia Costas que camiña imparable pola estela que Agustín deixou aberta; Europa Express, o que fora premio Jules Verne; Memorias dun neno labrego, manténdose desde os sesenta e demostrando que non só se le o último (... cando se ten cabeza); Cartas de inverno do que van máis de 100.000 exemplares vendidos, o libro dos libros de Agustín Fernández Paz, do que tamén recollen  A neve interminable, Contos por palabras, O único que queda é o amor, Aire negro e A viaxe de Gagarín;...
Unha viaxe pola fonte, Ler en mancomún, opfreceranos toda a información.



luns, 23 de xaneiro de 2017

Os mellores de 2016. Fervenzas Literarias

 
– Mellor libro de narrativa para A ferida do vento, de Antón Riveiro Coello.
– Mellor libro de poesía para Os fillos da fame, de Ismael Ramos.
– Mellor libro de ensaio/investigación para Historia das historias de Galicia, coordinado por Isidro Dubert.
– Mellor libro de teatro para A filla de Woody Allen, de Santiago Cortegoso.
– Mellor álbum de banda deseñada para Presas fáciles, de Miguelanxo Prado.
– Mellor libro traducido para público adulto para Festa no xardín, de Katherine Mansfield, por Estela Villar Nogueira.
– Mellor libro de literatura xuvenil para Jules Verne e a vida secreta das mulleres planta, de Ledicia Costas.
– Mellor libro de literatura infantil para Esmeraldina, a pequena defunta, de Ledicia Costas.
– Mellor libro traducido de literatura infantil e xuvenil para Unha última carta, de Antonis Papatheodoulou, traducido por Manuela Rodríguez.
– Autor/a do ano para Diego Giráldez.
– Ilustrador/a do ano para Miguelanxo Prado.
– Mellor capa de libro para adultos para Galería de saldos, de Diego Giráldez, feita por Iago Sánchez Losada.
– Mellor capa de libro de literatura infantil e xuvenil para Jules Verne e a vida secreta das mulleres planta, de Ledicia Costas, por Víctor Rivas.
– Mellor editorial do ano para Galaxia.
– Mellor crítico/a literario/a para Armando Requeixo.
– O mellor acontecido para o Culturgal.
– O peor acontecido para o pasamento de Agustín Fernández Paz.
– Mellor Libraría para Libraría Couceiro.
– Mellor medio de comunicación para Praza.
– Mellor blog/web literaria para Criticalia, de Armando Requeixo.”

mércores, 18 de xaneiro de 2017

Informe sobre a lectura e Bibliotecas Escolares



Nos datos do último Informe de Lectura 2017, sae a luz... que  un 39% da poboación española non le nunca ou case nunca, e só un 47% é lector habitual; aumentou o número de lectores frecuentes un 11,2 % nos últimos 15 anos.O número de librarías reduciuse moito aínda que menos que o número de puntos de venta de prensa.
Conclúe que os que máis len son os xóvenes, universitarios e habitantes de municipios de máis dun millón de habitantes.
Tamén pon de manifesto que medrou o número de bibliotecas, pero as coleccións están envellecidas (“En 2009 invertían 1,50 euros por habitante; en 2014, so 0,56 céntimos”).e os horarios reducidos, pola crise. Descenderon os préstamos a pesar de que hai máis persoas asociadas. O informe tamén deixa claro que as bibliotecas son aproveitadas só por un cuarto da poboación
Recoñécese como debilidade, a marxinación das bibliotecas escolares (ao diminuír o apoio público), o que afecta á baixa competencia lectora e informacional de moitos cidadáns. Neste aspecto, queremos e debemos referirnos a un artigo publicado por Faro de Vigo, no que se fala de Galicia como exemplo dunha liña innovadora para educación nos seguintes termos:
Noutyra nova, neste caso galega... dise:
"Os editores destacan o desenvolvemento das Bibliotecas Escolares, "unha rede extensa e cun gran nivel de actividade", sinalan. Recoñecen ademais que a pesar das dificultades económicas, esta rede é unha das máis activas. "Ao longo deste tempo, tal vez un dos logros máis interesantes ten sido a consolidación de verdadeiras redes territoriais", escriben. "No esquezamos -di o informe- que, por exemplo, en Galicia, onde o orzamento para as bibliotecas escolares é o máis elevado comparativamente en relación ao número de alumnos, en PISA obtivo resultados en competencia lectora superiores á media de España, OCDE y UE.
Ademáis resaltan a súa "liña innovadora" ao crear unha materia de libre configuración en Secundaria titulada Investigación e tratamento da información. É tamén un "exemplo excelente" en canto a actividades promocionais como clubs de lectura ou concursos.



luns, 16 de xaneiro de 2017

De como a lectura é un remedio para moitos males


Nun artigo publicado en La Opinión, dise:
"A lectura impulsa a actividade das nosas neuronas, loitando contra o deterioro cognitivo, mellorando a concentración e incluso a empatía. Ler xera novas conexións cerebrais que, sinalan os neurólogos, "póñenllo difícil á enfermidade". Ler é un exercicio tan indispensable como facer deporte. Cando lemos, as neuronas coaumentan a súa actividade e comenzan a exercitarse. Desta maneira, póñense en forma e preveñen a aparición da demencia, melloran a capacidade de concentración do individuo e incluso desenvolven unha meirande estratexia social.
(...) Vai para dúas décadas, Alexandre Castro Caldas, actual Director do Instituto de Ciencias de la Salud de la Universidad Católica Portuguesa, comprobou que a lectura podería ter incluso una repercusión anatómica no cerebro: as fibras nerviosas que unen ambos hemisferios son máis grosas nos lectores habituais, segundo un estudo no que comprobou que os analfabetos tamén identifican peor as palabras cando as escoitan.
 (...) As novelas e outras literaturas tamén teñen demostrado que axudan aos individuos a ser máis empáticos e mostrar máis habilidades sociais. Aprenden a interpretar situacións e sentimientos e coñecen máis estratexias para saber resolverlas. Ademais, os lectores son máis felices. A Universidad de Roma III publicou en 2015 un estudo sobre o índice de felicidade dos lectores. Os resultados demostraron que o seu índice era de 7,44, mentres que o dos non lectores baixaba a 7,21. "Unha diferenza aparentemente limitada, pero en realidade estatísticamente moi significativa", sinalan no informe. De feito, en cuestión de benestar distancianse aínda máis 7,12 contra 6,92.





venres, 13 de xaneiro de 2017

Efemérides



                                                                  Aproveitemos para reler a marabillosa tradución de Xela Arias
Unha páxina do Ministerio dá acceso ás conmemoracións:
En 2017 conmemoramos o centenario do nacemento de Gloria Fuertes, José Luis Sampedro, Augusto Roa Bastos e Juan Rulfo.
Hai cen anos que se publicaron as obras El bosque animado de Wenceslao Fernández Flórez e Greguerías de Juan Ramón de la Serna.
Cúmprense cincuenta da edición de Cien años de soledad de Gabriel García Márquez.
Cantas boas páxinas nos teñen dado!

xoves, 12 de xaneiro de 2017

Calendario do Libro e da Lectura


A través do calendario do libro e da lectura accedemos a unha serie de conmemoracións a ter en conta:
Letras Galegas dedicadas a Carlos Casares.
Centenario do pasamento de Eduardo Pondal.
Cincuenta anos da morte de María Mariño.
120 aniversario do nacemento de Eduardo Blanco Amor
150 anos do nacemento de Manuel Portela Valladares
100 anos da publicación de Da terra asoballada de Ramón Cabanillas.

martes, 10 de xaneiro de 2017

Soporte papel e dixital na educación. Opinións


Manuel Area está a dicir na actualidade:
"(...)Do mesmo xeito que hai dez anos atrás reclamei a entrada das TIC nas aulas, non só con argumentos educativos, senón tamén para evitar a entón denominada "fenda dixital", agora toca defender a presenza do papel nos colexios (sobre todo os públicos) para evitar o que puidésemos chamar como "a brecha impresa". Do mesmo xeito que as políticas educativas TIC, hai unha década atrás, serviron para ofrecer igualdade de oportunidades no acceso á tecnoloxía a aqueles nenos e mozos que non dispoñían das mesmas nas súas casas, hoxe temos que empezar a plantexar políticas educativas para garantir o acceso e uso dos libros en papel como instrumentos valiosos da cultura. (...)"
Tomado do seu blog "Ordenadores en el aula", falando arredor do libro El elogio del papel.

xoves, 5 de xaneiro de 2017

Libros para os Reis

 

Agora que están a chegar os Reis, si, os Magos, hai que escoller os libros para os máis pequenos. Non se trata de coller o primeiro que cae nas mans, non; hai que revisar e pensar; non todo vale.
Pasar polas librarías, remexer nos estantes de galego, porque si, xa sabemos que en castelán hai moita cousa boa, pero en galego tamén! E se non mercamos nós, se non regalamos nós... os libros galegos, quen o vai facer?
Nos avións, cando dan as instrucións, sempre avisan que debes poñerte o teu cinturón antes de poñerllo aos demais, que debes colocarte o salvavidas e a máscara antes de poñerlla aos demais... e alguén terá que dicir que debemos mercar o noso antes de mercar o dos demais, sobre todo cando o noso ten moita calidade, tanto coma os materiais dos demais que mercan os nosos nas súas linguas.
Vai un enlace á páxina de bibliotecas escolares de Galicia onde hai as mil e unha guías de recomendacións para este Nadal, quen dá máis?