sábado, 25 de febreiro de 2017

Poesía cada día (2)


 Poemar o mar de Antonio García Teijeiro con ilustracións de Xan López Domínguez, publicado na colección Merlín. 
Moi solto, moi áxil, coa dicción acorde ao poema... unha lectura que dá gusto e aproveita.
O tema moi querido e traballado polo poeta. 
O libro recollendo poemas moi curtos e xogando coa colocación dos versos, mantendo a rima, inventando palabras como sorrimar (sorrir o mar), homenaxeando a varios poetas (Alberti, Kruz Igerabide, Juan Ramón Jiménez) sempre co mar ao fondo e acollendo algún haiku para rematar... 
Moi boas as ilustracións de Xan López Domínguez, no seu estilo pero moi traballadas e introducindo un elemento nostálxico (doutros tempos) no mobiliario, na roupas da rapazada, uniformes,  elementos... máis surrealista con animais personificados sen que, neste caso, foran necesarios: galo mariñeiro, ondas semellantes a grupo humano, gavotas con funil na cabeza, sereas con dúas colas a modo de pernas,... as tonalidades tamén gardan unha ambientación antiga en amarelos, azuis, grises, marróns... 
Un libro para disfrutar, ao completo!

xoves, 23 de febreiro de 2017

Poesía, cada día (1)



Poemas birollos para ler cos ollos de Fran Alonso, publicado na colección Sopa de libros de Xerais.
No estilo de O meu gato é un poeta e do Poetíz@te. Todo feito por Fran Alonso: o deseño, o texto, a ilustración e case a maquetación. Xogando coa caligrafía e a tipografía, cores, tamaños... 
Di que “é un libro de poesía infantil que parte dunha concepción lúdica, divertida e transgresora da poesía". Os poemas nacen de dúas fontes fundamentais: a poesía visual e a oralidade. Botando man do elemento gráfico para facer que os poemas se lean coma se fosen cadros e buscando a complicidade das cancións infantís, dos arrolos e das sortes. 
O poeta fai deste libro unha proposta sorprendente e modernizadora. O resultado é un libro moi accesible que sitúa a poesía moi próxima á sensibilidade das nenas e dos nenos de hoxe . El, no apartado “Escribiu e ilustrou...” comenta que o libro parte da súa reflexión acerca de que a poesía para as primeiras idades queda no convencional e está moi apegada á tradición, pero esquece que hai unha parte importante da poesía que é gráfica, é dicir, que se le coma se fose un cadro, coa vista.”, e tamén di (...) que no noso ámbito esta poesía ten dun déficit na incorporación da poesía visual e doutros achados importantes moi consolidados na poesía para adultos...” 
Poesía tipográfica con elementos gráficos, elaborada a través do ordenador e da manipulación fotográfica, que ao tempo lle dá moita importancia á oralidade. 
Na web atoparemos un videoxogo elaborado pola súa filla: Alma Alonso Costas. Dúas xeracións unidas pola poesía,e a lectura, sempre a lectura.

mércores, 22 de febreiro de 2017

Libros xuvenís de variada tipoloxía (8)



Contos nerviosos de Fran Alonso, con ilustracións de Dani Padrón e publicado por Embora.
As ilustracións de Dani Padrón están realizadas nun estilo bastante diferente ao que nos ten acostumados, pero como sempre, con unidade propia, neste caso con debuxos en branco e negro.
Estes son realmente contos nerviosos que recollen  historias que nos desasosegan con casos de alerxias excesivas, de medos que sempre nos manteñen en vilo, as vergonzas máis grandes, o peor que nos podería pasar tal como o vemos en cada momento, persoas que pasan a converterse en personaxes ou que cambian de lugar e identidade, nenas que pasan de raíñas consentidas a enlodarse na lama...  A min persoalmente encántame "O meu aniversario", esa nena absolutamente consentida que verá coma o seu reino de consumismo e mimarrachada se descompón en anaquiños, canto por aprender! 
Os contos nerviosos non menten, son realmente nerviosos. Neles hai moito negativo do que nos machaca e fai a vida máis difícil: rapaces odiosos, alerxias, ruídos, máquinas e inconsciencia por destruír o que temos, os medos que nos fan perder a cabeza...  E Fran Alonso, como sempre disposto a abrirnos unha nova porta pola que entrar para ler e ver a realidade, con outros ollos.


martes, 21 de febreiro de 2017

Libros de variada tipoloxía (7)


Un par de libros que recollen a diversidade.

A doniha e o taxidermista de Séchu Sende publicado por Diario Liberdade, Fundaçom Artabria e Semente Compostela.
Escrito e ilustrado por Séchu Sende, un diario escrito entre o 15 e o 22 de outubro de 2014
Con motivo da inauguración do Museo de Historia Natural Luís Iglesias da USC o autor vai contando as visitas cos seus fillos e todo o que sucede arredor... destes feitos e dun estraño taxidermista. 
Nun galego que non é o da normativa oficial e unhas historia que é o cotián no que se introducen outro elementos.

Dominicanas somos de Enrique Mauricio e Carlos Taboada publicado pola Asamblea de Cooperación pola Paz.
Unha historia contada en cómic na que o importante non é a calidade do relato nin o debuxo nin a ilustración senón o que se nos cona acerca dos cambios que se están a producir a respecto da muller dominicana que se empeña en mellorar a súa vida, traballar e estudar, organizar negocios coa axuda das ONG e enfrontarse (dunha maneira moi suave) ao machismo para cambialo sen crear conflito (polo menos nesta historia). Interesante para ver esa visión da muller negra e latinoamericana, a aceptación do seu físico, para visibilizar o problema dos descendentes de haitianos na república dominicana, para coñecer a aparición das promotoras (de saúde, hixiene, prevención de droga e violencia...) e ir aclarándose cun glosario, unha información sobre a cultura taína, o movemento 4% do PIB para educación, unha receita típica e a explicación de como naceu o libro “Dominicanas somos” grazas a unha subvención da Xunta.

Libros infantís de variado tipo (6)



Para onde imos cando desaparecemos de Isabel Minhós Martís e Madalena Matoso, traducido por  Anair Rodríguez para Xerais. 

Cando desaparecemos podemos estar agochados aí ao lado para que non nos vexan, porque para que realmente poidas desaparecer ten que haber alguén máis. Ese que se decata que xa non estás, e ese queda cheo de dúbidas... por iso se pregunta a onde se van os que desaparecen.
Un libro sobre a morte cun certo humor e alegría, porque xa chega con  pensalo.
As ilustracións semellan vellos gravados populares, con tintas planas e recortados; unhas imaxes case xeométricas.
A autora é ben coñecida no mundo do libro infantil galego con títulos como Ovelliña, dáme la, P de papá ou Grazas. 

venres, 17 de febreiro de 2017

Libro infantil de variada tipoloxía (5)


Unha festa sorpresa de Pat Hutchins, traducido por Sandra Senra Gómez e Óscar Senra Gómez para a colección Tras os montes de Kalandraka. 
Esta familia de tradutores que nos teñen acostumados a uns resultados de moita calidade, semellan especializados no álbum clásico, con obras como a de Pat Hutchins, a serie Osiño e títulos como Con Tango son tres ou Imos cazar un oso
Este libro remite á marabillosa estética da autora que xa conta con obras en Kalandraka como O paseo de Rosalía, Onde está o poliño de Rosalía? ou Boas noites, bufo! Uns  libros absolutamente recoñecibles onde a sinxeleza das historias e o seu ambiente, se ve enriquecido por unha ilustración moi barroca e do gusto infantil. 
Na presentación editorial fálase de humor e rumor, de como algo que ía ser secreto se converte en algo que vai cambiando segundo pasa de boca e boca.  
Un novo clásico infantil que debemos agradecer a Kalandraka.

xoves, 16 de febreiro de 2017

Libro infantil de variada tipoloxía (4)

A viaxe de mamá de Mariana Ruiz Johnson que xa obtivera o V Premio Internacional Compostela de Álbum Ilustrado con Mamá en 2013. 
Neste caso, a tradución de Manuela Rodríguez, e está publicado por Kalandraka, na colección Demademora
Metémonos na pel dunha familia de elefantes, máis ben no corpo da filla elefanta, que asiste aos preparativos da nai para a viaxe, despídea no aeroporto e retoma a vida co pai ao longo dese tempo.Un tempo diferente, no que lles cambia a vida: será o pai quen lle conte os contos, métese na cama dos pais, queda en pixama vendo a tele... é dicir, facendo todo o que non fai cando está a nai. Pola noite falan con ela por videoconferencia para que lles conte todo o que fixo, ata que volve e, daquela, os días volven a ser o de sempre; recobran a rutina.
Un conto moi interesante para ter a man cando a nai sae de viaxe, anda que pode dar algún desgusto, en vista da permisividade do pai elefante.   

mércores, 15 de febreiro de 2017

Libro infantil de variada tipoloxía (3)

O cociñeiro Martiño de Iago López, un mestre de infantil e home de teatro que pon o seu saber ao servizo dun o relato. Ilustracións de Macu Romero, para un álbum ilustrado publicado por Xerais. 
Un conto acumulativo. O rei busca cociñeiro, iso lle contan dúas veciñas a Martiño que se pon mans á obra pero ao chegar á casa descobre que os ratos o comeron todo e non conta con ingredientes. Ponse a chorar á porta da casa... e por alí van pasando uns e outras que lle irán traendo o necesario ata que consegue elaborar a sobremesa. Daquela comeza outra aventura que é a ida a palacio...
Unha historia feliz na que un grupo de xente se axuda e divirte xunta. Quen dá máis?



martes, 14 de febreiro de 2017

Libros infantís e de variada tipoloxía (2)



Cepillo de Pere Calders con ilustracións de Carme Solé Vendrell, foi premio Lazarillo en 1981, Premio Serra d´Or no mesmo ano e Premio Generalitat de Catalunya en 1982. 
Preséntasenos agora da man de Kalandraka, en tradución de Xosé Ballesteros, na colección Maremar.
Ao neno da casa retíranlle o can por desfacer un sombreiro no medio do xogo... cousas de cans, a quen non lle pasou? O neno da casa está tan triste que busca outro can para poder compartir con el todo o que antes coñeceu, busca e busca ata que atopa un cepillo vello e abandonado. 
Aí comeza a historia, unha historia de afectos e terquedades, de amores e posibilidades. Un bo libro, co empeño e a bondade como ingredientes.
Volver atrás non ten nada de malo, senón o aval de atoparse cun clásico.