24 de outubro, día das bibliotecas

 

O 24 de outubro celébrase o Día das Bibliotecas, pero as bibliotecas escolares tentan celebrar máis que o día, o mes. Outubro, mes das bibliotecas escolares. En outubro xa se poden poñer a disposición do público toidos os recursos, houbo tempo para reorganizala, preparar o equipo e o horario, programar as actividades e programas... Cando se abre a biblioteca aprovéitase para facer a formación de usuarios/as, poñer en marcha as mochilas viaxeiras, as seccións de aula e o préstamo individual.

A edición deste ano, baixo o lema "Bibliotecas, sempre ao teu carón" céntrase en destacar o importante papel que xogan as bibliotecas ofrecendo acceso á cultura, ao coñecemento e ao entretemento en calquera lugar e circunstancia.  Porque as bibliotecas son aptas para todos os públicos. Son o recurso cultural imprescindible en cada lugar e en todo tempo, por iso nos molesta tanto cando os seus horarios se reducen ou o feito de non poder con contar con bibliotecas en todas as entidades de poboación. En Galicia sempre botaremos de menos os bibliobuses ou calquera tipo de biblioteca móbil que percorra as aldeas para ofrecerlles servizos ás persoas que viven no rural.