I GALA DO LIBRO GALEGO 2016. Modalidade de obra traducida.

E resultou ganadora...

Mocidade.Un relato de Joseph Conrad, en versión de Alejandro Tobar. Publicada por Hugin e Munin, unha editora de tradutores e obras traducidas ao galego; unha iniciativa que colabora na normalización lingüística do país. 
Moi boa tradución, pasando a constituírse nunha obra enriquecida pola cantidade de notas que engade o Tobar. 
Sempre estamos a tempo de volver a Conrad, ao seu mar e aos personaxes que aprenden e nos axudan a facelo a nós. 
Unha novela inciática!

I GALA DO LIBRO GALEGO 2016. Modalidade de proxecto literario na rede.

Resultou ganadora a páxina Poétic@ do escritor Fran Alonso.

Fran Alonso, editor, narrador, poeta... tivo a ben poñer en marcha está páxina de poesía na rede. Sempre abrindo portas... tamén o fixo cando publicou Poetízate, unha antoloxía de poesía para a mocidade, e tamén cando botou a andar a asociación Espazo lectura, outra das ganadoras nesta gala.

Poétic@ é un proxecto único de poesía na rede. Un espazo no que ir creando poesía aproveitando as posibilidades da hipertextualidade e o transmedia. Vale a pena entrar a xogar e ler!!!!

A ver se deixa pegada...

I GALA DO LIBRO GALEGO 2016. Premio honorífico á editora

Nunca está de máis lembrar... aínda que xa pasara tempo. A Gala do libro é anual e debe durar todo un ano, o ano todo.

O libro honorífico á editora recaeu en Laiovento, a editora creada por  Xosé Manuel Beiras, Pepe Carreiro, Manuel González Millares, Francisco Pillado Mayor, Afonso Ribas e Xesús Couceiro Rivas. A editora que trata temas como nacionalismo, lingua e literatura, economía e teatro, estivo dirixida por Francisco Pillado Mayor ata hai pouco tempo cando tomou o relevo Afonso Ribas.

Xa conta co Pedrón de Ouro 2015 e agora accede a este premio concedido polos propios compañeiros.

Unha editora que contra vento e marea pon na man dos lectores una serie de libros que sería imposible ver impresos noutra editorial.

I GALA DO LIBRO GALEGO 2016. Modalidade de iniciativa bibliográfica

Lendo lendas, digo versos. Sin dúbida unha das grandes obras de literatura infantil do ano. Da man de AntonioGarcía Teijeiro e Antonio Reigosa, con ilustracións de Xosé Cobas*.
Moi bo libro, co bo facer do recopilador de lendas que as conta como ninguén, o versificador que se introduce nas estruturas populares e nos recursos da tradición para darnos outra versión que bebe tamén do pasado. Unhas ilustracións suaves, a lapis, no límite de preciosismo... contendo a pequena imaxe case temerosa, a imaxe que copia e a que só ven da imaxinación; todo mesturad, ás veces introducindo a xeometría ou un certo surrealismo e hiperrealismo.
Un gran libro para agasallo, para ler nos tres códigos. 

*Realmente, Cobas, semella o verdadeiro ganador desta Gala, pois participa neste libro, no ilustrado ganador Cadros dunha exposición e na capa da novela de Manuel Rivas (tamén ganadora na súa modalidade): Os últimos días de Terranova.

I GALA DO LIBRO GALEGO 2016. Modalidade de libro ilustrado

E resultou ganadora...

Cadros dunha exposición. Mussorgsky interpretado por Sinopoli. Texto de José Antonio Abad (psicólogo, pedagogo, escritor, divulgador musical) e ilustracións de Cobas. 

Un libro de editor, no que se escolle a mellor opción en canto á música e a súa versión, o autor do texto escritor e divulgador musical, e o ilustrador.
Libro música.
Soportes combinados para obras mixtas: texto, ilustración, música... Todos eles ao servizo da calidade e da cultura. A mellor cultura ao alcance do lector espectador.

I GALA DO LIBRO GALEGO 2016. Escritor galego universal. Xornalismo cultural

Resultou escollido como escritor galego universal o escritor catalán Pere Gimferrer.
Sermos Galiza resultou ser o medio ganador en xornalismo cultural.

I GALA DO LIBRO GALEGO 2016. Premio honorífico á libraría

A libraría Pedreira resultou ser a escollida para recoller o premio honorífico.

Situada na rúa do Home Santo, nace (desde a súa creación en 1981) cunha clara vocación de defensa e divulgación da cultura galega, tal como demostra coa súa participación en numerosas feiras do libro (romaría dos libros de Compostela, feiras das diferentes cidades...), das industrias culturais (Culturgal), etc. Desde o 1998 conta con páxina web.

Organiza un programa de actividades dentro do marco do comercio cultural como presentacións de libros, recitais de poesía, contacontos, os venres nas librarias... participando tamén en diferentes debates e forums no Consello da Cultura galega ou na Fundación Carlos Casares.

No 2003 recibiu o premio IRMANDADE DO LIBRO, da Federación de Libreros de Galicia, á mellor libraría galega e no 2003 e 2004 foi finalista no premio á mellor Libraría Cultural a nivel español.

I GALA DO LIBRO GALEGO 2016. Modalidade de teatro

E resultou ganadora...

Xogandocon gatos de Antón Cortizas, publicado por Xerais e AGADIC. Leandro Lamas na ilustración. A obra xa resultara ganadora no Premio Manuel María e Literatura Dramática 2014. 
É teatro infantil, ese que nos ten que axudar a crear lectores e espectadores. 
O obxectivo do autor ao escribir a peza é lembrar a arte de xogar, para descubrir o xogo popular, introducindo xogos e textos de literatura oral. Atopamos teatro de actores e actrices, teatro de sombras chinesas, mimo, monicreques de corda e monifates de luva, danza e poesía, acompañmento musical e implicación dos espectadores. O verso, a rima, a prosa combinada, ... teatro xogo (lengalengas, tradición, fórmulas para botar sortes, adiviñas ...)
E conta o argumento que o Gro (un monstro, un ogro tal como nos indica o nome) rouba a memoria á meniña e as fadas tentan devolverlla, buscan a ver quen sabe xogos para copialos e levarllos á nena, e tardan en darse conta de que diante deles están os gatos a facelo. Vencen ao Gro que marcha desesperado. 
Ás tres escenas que tiña a peza premiada engádelle o autor unha cuarta, opcional, con xogos relacionados con gatos coa explicación correspondente e na que participaría o público, xustamente, xogando. Dánlle remate ao volume as partituras das cancións citadas. 

Din... da literatura infantil

A pesar de estar destinada a nenos, Alfredo Gómez Cerdá entende que a literatura intranscendente e sen mensaxe xa non é «admisible», pois en calquera historia, relato ou conto «ten que haber algo, porque aos nenos gústalles profundar, atopar algo máis; eles xa entenden que un libro non é un xoguete que se pasa, senón unha historia que pode remover a súa sensibilidade, facerlle pensar e reflexionar». Por iso non hai que escribir ñoñerías pensando que os lectores aos que van dirixidas as letras non van ter agudizada a súa comprensión lectora. Cerdá tira de memoria e lembra unha frase que leu de Roald Dahl, o autor de Charlie e a fábrica de chocolate e Matilda, na que dixo: «Cando escribo para nenos non me gusta perder de vista o sentido do humor». E para o autor de El monstruo y la bibliotecaria, «esa é a clave, non perder de vista o sentido do humor».
Quizá un dos asuntos máis curiosos é que, por mor de publicacións como as de Alfredo Gómez Cerdá ou as entregas do El Tesoro de Barracuda, de Llanos Campos, moitos foron os pais que se afeccionaron á lectura. O autor madrileño lembra a campaña que animaba aos pais para ler para que os nenos tamén lesen. Con todo, «agora é ao revés, está a suceder o fenómeno contrario, os fillos están a ler e os pais están a afeccionarse por eles».

Son opinións.

I GALA DO LIBRO GALEGO 2016. Modalidade de poesía

E resultou ganadora:

Oso,mamá, si? de María Lado, editado por Edicións Xerais de Galicia.

Un poemario cunha unidade moi definida. A experiencia da maternidade cunha poesía sinxela e clara.

A relación co bebé dende antes de nacer, no tempo do parto cando é necesario debuxar ese sorriso no ventre, nos primeiros pasos e primeiras palabras, no tempo compartido entre os afectos e as separacións. A crueldade facéndose presente apurando a vida mostrándose a través dos animais para que sexa máis doado asumila, porque semre foi así nos contos infantís, porque os animais no imaxinario están para iso... para contarnos os que doutra maneira sería demasiado doloroso.