mércores, 31 de agosto de 2022

Falemos dalgunha editorial

Hoxe toca Baía e a súa colección Meiga Moura. O resultado dun premio ou áis ben, unha colección que ten o apoio dun premio. Ao final de cada un dos libros podemos ver o listado de títulos: premios (O lume dos soños, Lóbez, Os globos de andar, Violeta Tamurana, Bandeiras negras, Miña querida  Sherezade, Denébola a Roxa, As voces da auga, Auga e lume), finalistas (Un marciano neste mundo, O son da buguina, Unha cabana na lúa) e outros que chegan á editorial polos camiños acostumados. Aínda que na convocatoria non di nada acerca do xénero no que ten que estar escrita a obra, pasa o que acostuma: a maioría das obras e premios son de narrativa, hai algunha excepción, o libro de Carlos Labraña finalista do ano 2016,  Tres mulleres do seu tempo de Heidi Kühn-Bode (onde temos a referencia a Brigantia, Xoana de Vega e María Casares), Valentino Rufini e Âkil Pillabán, de viaxe a Milán (e van sen un can) de Roberto Salgueiro. E como primicia, o último premio convocado (correspondente ao 2022) foi conseguido por Ánxela Gracián e unha obra de teatro (a primeira vez que unha obra deste xénero resulta ganadora), o seu título é Donas de nós. Esta é a opinión do xurado: "A súa proposta de revisión e reescrita da mellor tradición literaria ao incorporar como protagonistas personaxes como o Mago Merlín, a Fada Morgana, o Príncipe Azul ou os Reis Provenzais, creando un artefacto dramático metaliteraturizado non exento de humor e ironía, onde se visitan e actualizan temas importantes do noso tempo e de todo tempo dando unha ollada claramente identificada e feminista. Tamén si, coa súa decisión quixo apostar pola escrita teatral como xénero idóneo para achegar os valores da creación literaria e como vehículo para convidar á mocidade a coñecer e recoñecer o mundo que nos rodea, as súas problemáticas e os seus retos e os camiños aínda por andar, así como unha ferramenta para o desenvolvemento persoal."

domingo, 28 de agosto de 2022

Unha nova banda deseñada: Miquits

 

Unha nova banda deseñada: Miquits de Alba de Evan e Xabier Domínguez nos textos con Paula Cheshire nas ilustracións, publicado por Aira.

Así o presenta: "Miquits é un gato, mais non un calquera, é o familiar dunha bruxa! Xunto ela vive aventuras perigosas e emocionantes para se esmendrellar  coa risa. Atréveste a acompañalo Con esta banda deseñada para cativos, queremos achegar a historia do gatiño Miquits, o gato dunha bruxa. Xunto con ela vivirá mil e unha aventuras, aprendendo o valor da amizade e do compañerismo."

Unha bruxiña boa, reboa. Vive cun gato que é amigo e o protagonista da historia. Polo medio vai aparecer un rato que medra sen xeito ao caer na pota da bruxa, un can que tamén acaba sendo amigo e un grupo de gnomos que andan sempre a crear problemas. Unhas historietas para divertirse e ver o amorosos que poden ser todos os seres. Cómic para a infancia, produtos necesarios.

venres, 26 de agosto de 2022

Unha serie de Pere Tobaruela: FORMIG4S

Pere Tobaruela (aos textos) e Andrés Meixide (nas imaxes) xa levan publicadas varias entregas destes Formig4s: Misión París, Misión Nova York, Misión Tokyo, Misión Barcelona, Misión Camiño de Santiago e agora aparece Misión Rosalía. Deixamos as cidades e os percorridos para adentrarnos na literatura, seguimos co malo (Paumao) e cos catro valentes que o enfrontan, neste caso para recuperar á poeta e conseguir que os seus textos volvan ter todas as palabras que cómpren. Cultura e aventura. Imaxe, maquetación, tipografías diversas e presentación ao estilo das grandes obras comerciais polas que semellan devecer as nosas criaturas... Un bo intento de xente que traballa a favor do noso e que debemos ter en conta. A inbtrodución de textos informativos, poéticos e de banda deseñada ao lado da narración enriquecen a obra.

Tobaruela, ese escritor catalán e galego que tan ben nos coñece e sabe de nós pode dar fe de moitas cousas e por todas elas agardamos, na confianza de que non nos vai defraudar.

martes, 23 de agosto de 2022

De vampiros

A historia do vampiro que perdeu os caveiros de Xosé A. Perozo está ilustrada por Lucía Cobo e publicada por Galaxia. Un libro con moi boas ilustracións que enchen as páxinas e unha cantidade de texto superior ó dun álbum. Ao meu entender, é unha obra que fuciona moi ben, dende un principio no que se presenta ao pequeno vampiro que é tan despistado que perde parte do nome, pasandoa chamarse Piro, porque seica se chamaba Suspiro (non pensedes que era por Vampiro), pero tampouco foi porque perdera parte do seu nome sen máis (hai outra historia tamén para isto), e seguimos... o despiste fai que esqueza onde deixou os cabeiros e buscándooas atopa algo que ben ñodedes adiviñar. Unha historia de vampiros pero tamén de fantasmas, de bosques malditos, arañas xigantes e serpes, bruxas e dragóns, de princesas e rato Pérez.

O autor vai engadindo historias coma olas dunha árbore, o pequeno vapiro vai dunha perda a outra ata acabar atopándose, e mellorándose.

domingo, 21 de agosto de 2022

A Deputación da Coruña homenaxea a Agustín Fernández Paz, primeiro premio Raíña Lupa

A Deputación da Coruña homenaxeou a Agustín Fernández Paz, ganador da primeira edición do premio Raíña Lupa de literatura infantil e xuvenil, co libro Palabras para voar.

É agora, na XV edición cando deciden volver a vista atrás e lembrar aquel primeiro autor e libro premiado, Cos pés no aire, en 1998. Cando o Deputado de Cultura fai a laudatio de Agustín, lembra aquel momento no que en 2010 rexeitou o Premio Cultura Galega das Letras como acto de protesta pola política lingüística do Goberno galego daquel momento. Foi bonito lembrar aquel acto de valentía que non volvemos ver por parte dos nosos escritores, aqueles que traballan coa lingua como material básico, nin por parte dos ensinantes que poderían estar comprometidos coa normalización do idioma, nin por parte de ninguén.

Neste libro homenaxe, participan varios dos ganadores do Raíña Lupa: Mario Pereira (2ª edición), Antonio Reigosa (3ª), Antonio Yáñez (6ª), Carlos López (8ª), Xesús Fraga (9ª), Hécgor Cajaraville (10ª), Marilar Aleixandre (11ª), An Alfaya (12ª) e Andrea Maceiras (15ª). Mario entrégalle o capítulo dunha historia, os demais dialogan cos Agustín e a súa obra, nun caso ou noutro é un acto de amor polo Merlín que botou a andar a LIXG e que a situou nos lugares máis altos. Con el fóisenos a posibilidade dun premio Ándersen para Galicia, para o galego. Con el fóronsenos moitas cousas. 

As imaxes de Cobas acompañan as historias cuns brancos de papel, uns fondos ricos en propiedades, raiaduras de metal, obxectos case surreais, lúas redondas, castelos no precipicio... o imaxinario dun pintor.

mércores, 17 de agosto de 2022

Novela xuvenil

Erica, de Ana Vigo, está publicada por Galaxia na colección Costa Oeste.

Así se presenta: "Erica e seu pai chegan á vila da Dormecida tras unha vida de continuas mudanzas. Cansa de ter que facer amigos que perderá invariablemente ao pouco tempo, rexeita intentalo de novo, mais os nenos do lugar insisten en levala á “mansión”. Neste lugar fantástico descubrirá que existe un mundo paralelo, Morfeonía, habitado por espíritos, dende o que estes soños se poden traer á Realidade. Aínda que Erica non pode soñar por unha estraña enfermidade, decátase que ten un talento natural para xogar cos soños na Realidade. Grazas aos seus novos amigos, Dalia, Hadri e Agata, cos que ten as súas rifas polo seu carácter competitivo e ambicioso, coñece a necesidade de equilibrio entre os reis de Morfeonía, Soño e Pesadelo, baixo as ordes da Grande Imperante."

Un mundo paralelo combinado co real. Un universo no que os soños son o potencial co que cambiar o que sucede. Un mundo no que o ben e o mal seguen a xogar ou pelexar mentres a humanidade padece ou se deixa gobernar... Un pai e unha filla que viaxan por mor do traballo del, ou por outras razóns?. Unha historia que agacha outra historia. Un segredo que terá que ser desvelado. Unha loita que posibilitará un futuro de luz ou de sombra. 

xoves, 11 de agosto de 2022

Un novo libro de Xoán Babarro

Carliños, capitán! é o novo libro de Xoán Babarro, ilustrado poe Lidia Nokonoko e publicado por Galaxia na colección Árbore para lectorado a partir de dez anos.

Na páxina aparece así:

"Un neno que debuxa ñus,

…ኙኙኙኙኙኙኙኙኙኙኙኙኙ…,

un papagaio con síndrome feirante,

unha avoa detective,

unha nai e un pai que se separan,

un psicólogo, un veterinario,
un locutor famoso,

unha banda de traficantes,
unha escola do Brasil…"

E nós explicámolo. Ao neno, que conta a sua historia, dáselle por colocar palabras por orde alfabética primeiro, logo por inventar alfabetos (por chamarlles dalgunha maneira)... e el, é máis teimundo que Greta Thunberg (no seu dicir). Algo vai mal, mandan recado e toca psicólogo. O seu problema é outro, ou o mesmo, sepáranse os pais e el non dá entendido por moito que lle digan que lle queren igual, que pasa nas mellores familias (pero non na súa!, gustaríalle dicir). Nesas tráenlle un papagaio (a el que lle encantan os animais, debúxaos e adóraos) que tivo un accidente, coidan del a avoa, a nai e algo o pai. Logo seguimos a historia do papagaio con mil e unha aventuras con larapetadas porque o seu falar pode volver tolo a calquera, o veterinario bota unha man (igual que o psicólogo), ata intervén un deses programas de televisión, seguindo á ave descubrirán a banda de traficantes de animais tropicais, poderán devolvelos e no medio debe ir o seu, ero dende Brasil escribe a rapazada dunha escola dando razón de Rodobico e lembrando a maneira que el tiña de chamalo: "Carliños, capitán!". A riqueza de léxico, o bo facer de Babarro con todos os xogos de lingua posibles, unha man á tradición e outra á creatividade e unha obra a ter moi en conta. Miremos o que escribe sobre a lectura na páxina 40: "Eu vivíao con moita emoción. Permitíame ser protagonista de múltiples aventuras. Acababa de ler un libro e  empezaba con outro. Os títulos semellábanme planetas habitados, con insospeitadas rutas que eu podía explorar. E, por sorte, para transportarme a eses planetas non era preciso ningún foguete espacial. Considerábao un privilexio. -E nunca te equivocaches de camiño? -Ufff! Máis dunha vez! Soíame extraviar cando se acababa unha liña e comezaba unha ilustración. Nestes casos, gustábame perderme poe entre as paisaxes. Unha vez que me cansaba de vivir aventuras ilustradas, regresaba de novo á ruta dos caracteres."

As ilustracións axudan e moito a pesar da limitación ao azul.

luns, 8 de agosto de 2022

Segunda parte dunha posible triloxía

Un segredo é a continuación do libro Un fillo de Alejandro Palomas. 

Esta segunda entrega, traducida por Mercedes Pacheco, preséntase así: "Nazia é a mellor amiga de Guille. Antes vivía no supermercado paquistaní do barrio cos seus pais e o seu irmán maior, pero por unha situación familiar difícil agora estará con el e co seu pai Manuel durante un tempo; pero garda un segredo que non lle pode contar a ninguén, porque así llo pediu a súa nai, a non ser a Guille, que é coma o seu irmán.

En Un secreto, Alejandro Palomas retoma os personaxes de Un fillo, aos que se engaden algúns máis, e achéganos, cunha prosa sinxela e tenra, a temas complicados como o acoso, os matrimonios de conveniencia e as dificultades da vida vistas desde a perspectiva dos nenos.

Un libro que transmite amor, comprensión e humanidade."

Contado cos mesmos ingredientes do primeiro dos libros, atoparemos, de novo, os personaxes do enno e o seu pai, a orientadora e a profesora. Unha obra que quere crer no bo facer dos profesionais que están ao servizo do alumnado e as familias. Un mundo máxico creado polo imaxinarios dos nenos que envolve a crueza do que lles tocou vivir. 

xoves, 4 de agosto de 2022

De infancia e morte, de desaparicións e tempo continuo

Mamá vive en min de Rosario Baleirón Sóñora e Estefanía Padulles publicado por Hércules edicións. 

Na voz da mascota do irmán máis pequeno (aquel que decidiu chamarse Martiño cando coñeceu a historia dun santo que reparteu a súa roupa), esa mascota que é un can de peluche e ten por nome Canciño. El vai contando o día a día da familia (co pai case desaparecido, ata o final), a relación entre os irmáns e coa nai, as cousas de nenos, dos contos que lles conta a nai, da súa enfermidade e morte e da dor que os ensombrece e de como o tempo o vai curando todo. A memoria permanece, os recordos están dentro deles e acompañarannos sempre. O libro semella unha homenaxe da autora á cuñada e aos dous sobriños orfos. Porque tamén isto o hai que aprender, a despedirse e a permanecer, a deixar de xogar co peluche pero gardalo.

Adeus amigos de Begoña García - Alén é o XV Premio Castelao de Banda Deseñada da Deputación da Coruña. Un cómic especial, case minimalista cun xogo de dúas cores e liñas sen apenas fondos. Un barco pantasma cunha tripulación desaparecida que acaba volatilizándose, pero non só el, tamén se evapora un soldado de chumbo, un neno...

Así se presenta: "Un barco ten vontade propia. Se te fixas ben, verás á pantasma que pasea por Ferrol. Un neno investiga. Presente e pasado son unha mesma cousa. Unha nai perde a paciencia. Un pai tarda en regresar. Un paracaidista de xoguete cae por última vez. Todo sucede ao mesmo tempo. Unha viaxe calma que a través de viñetas precisas, desemboca nun humilde pobo galego, e ..."

luns, 1 de agosto de 2022

De superheroes

Superheroínas e superheroes. Manual de instrucións. Davide Cal & Gómez, tradución de Maruxa Zaera. Publicado por Nubeocho.

O autor fala directamente co lector supoñendo que quere ser un superheroe ou unha superheroína e vaino asesorando paso por paso. Ha de coidar a súa apariencia (traxe, máscara...), superpoderes que vai ter, a orixe deses superpoderes, as mascotas ou axudantes que vai ter, os supergrupos aos que vai pertencer, os vehículos que vai usar, a base secreta, a primeira misión... e remata anunciando a escola de superheroínas e superheroes á que poderán asistir para chegar a acadar o seu obxectivo.

Unha vez máis (e, cantas van?) nos atopamos coa dificultade de acceder a información sobre o libro en galego, incluso acceder á capa do mesmo en galego na páxina da editorial (ben se ve que houbo que conseguila noutro lugar) que o presenta en catalán, castelán, inglés, italiano... Somos invisibles? Teñen interese en facernos sentir mal? Será que somos moi sensibles? A todo isto se poderá contestar en breve... Continuará!

Os autores son os campeóns olímpicos? Tampouco ninguén nolo dixo...