mércores, 28 de setembro de 2022

Varios libros da mesma autora. Traducións

Álbumes con gardas moi ben traballadas. Todos da mesma autora e publicados por Entrenubesycuentos.

 
Oito patas de Ana Meilán (autora e tradutora) e Desirée Aracibia. "Pódese cambiar o destino? Lucy así o creu. Ela non nacera para encher paredes con fios gris perla. Ela, filla, neta, bisneta y tataraneta de grandes tecedoras, demostrará ao mundo que unha araña no so vive para tecer. Un libro para crer na forza de un mesmo incluso cando tes que buscar o  teu propio camiño." escribe e editora Entrenubesycuentos. A hisotria dunha araña que non sabe tecer a pesares da cantiadade de títulos que a súa familia  ten ao redor da costura... Ela convértese e pintora pois coas sáus patas molladas en diferentes cores goza o que non facía tecendo con fío gris. A defensa dun mundo de cores. Na presentación dise que é un libro para crer na forza dun esmo incluso cando tes que buscar o teu propio camiño.

Bágoas debaixo da cama de Ana Meilán e Marta Mayo. Simón nace e medra chorando, por iso todos lle chaman chorón. Un día decide agachar as bágoas e vainas metendo en botes que garda debaixo da cama, cotinúa recollendo tamén as dos demais... ata que se dá conta de que se non choramos os demais non ven o que sentimos, daquela decide devolvelas.



Un día tiven un soño de Ana Meilán e Paco Ortega. Unha ilustracións minimalista e moi boa na que xoga tamén con palabras. A nai fala en primeira persoa do soño que tivo un día e como este medrou na súa barriga ata nacer. Esa conversa resulta marabillosa, co frases como "Estarei aquí cando eu xa non estea" ou "Sentín o teu ar escorregando nas miñas pernas (...) cambiaches o meu ventre polos meus brazos".

luns, 26 de setembro de 2022

Unha tradución de excelencia

Iso me parece: unha tradución excelente. Estou a falar de Bambi. unha vida na fraga de Felix Salten traducido por María Alonso Seisdedos e publicado por Galaxia con ilustracións de Begoña G. Arce.

A versión galega, estou segura que é moito mellor que as traducións a outras linguas. María Alonso Seisdedos semella gozar coas palabras, buscando as maneiras máis propias de facer o relato dese pequeno corzo que chega a príncipe e acada a prestancia e sabidoría dos vellos da estirpe. Todas e todos coñecemos a Bambi a través da película de Walt Disney, unha historia preñada de tenrura que nos fixo chorar e sempre gardamos na maleta das lembranzas, incluso para facer chistes. Tratábase dunha referencia que compartíamos e que nos traía o mellor da infancia: a sensibilidade e o espertar á vida coa curiosidade por bandeira.

Agora, cando a leo, doume conta de que nesta historia hai moito que debullar, dende as conversas do pequeno caparro coa nai e con todo canto animal vai atopando na fraga e no prado ata o respecto que sente ante os maiores. El é amable con todo o mundo, vai comprendendo os segredos da natureza e descríndoo a El, o gran perigo. Con Bambi e o resto dos animais da fraga entramos no medo e os instintos, sentimos en propia pel a necesidade de facer algo sen entender a razón. 

mércores, 21 de setembro de 2022

Os ilustradores: Víctor Rivas e Xosé Cobas


Os dous últimos libros de Antonio García Teijeiro fan que nos deteñamos nos artistas que os ilustran. No xardín do poeta, unha homejaxe a Lorca, publicada colección Merlín, conta cunhas imaxes marabillosas de Víctor Rivas. Un traballo impresionante, pola calidade e a abundancia. Semella un agasallo ao autor. Rivas déixase levar no tempo de pandemia a suma imaxe tras imaxe ata crear un produto do que o autor debe sentirse máis que orgulloso. 

Igual pasa con Que demo de monicreque! publicado por Galaxia. Aquí é Xosé Cobas o que asume o reto de acompañar o texto de García Teijeiro cunhas ilustracións tamén abundantes e de moita calidade. Unha historia ao redor dun poeta en horas baixas ao que vai axudar un monicreque a espertar a creatividade grazas a un saco de palabras. Desa bolsa e desas verbas van nacer poemas, o que fai que o libro combine prosa e verso. A xenerosidade de Cobas lévao máis alá das ilustracións ata realizar o retrato do poeta e o propio que coloca nas lapelas.

Dúas obras que lembraremos. Dous ilustradores demostrando a súa valía.

domingo, 18 de setembro de 2022

Falando de humor e comezo de series (ou iso agardamos)

Curros & Holmes no misterio d´O Kapital de Marcos Calveiro, tráenos de novo ao poeta Curros, neste caso, sitúao no Londres de Holmes no que Marx está a escribir a súa obra. Unha historia detectivesca na que as verbas de Curros están nacendo entre as deducións de Holmes e a loita de Marx, entre as reivindicacións irlandesas e unha cidade na que abunda a pobreza e a delicuencia ao lado de sires e miladis. A riqueza da linguaxe de Calveiro faise visible entre os versos presentados en prosa do poeta. Un bo empeño!

Chega, tamén da man de Galaxia a Aproximación á esquiva figura de Celestino Carballeira de López. Juan López Rico déixase introducir por Perfecto Conde (cousas de xornalistas) e un limiar con biografía do tal Celestino por parte do autor. A continuación os viñetas, todas elas ao redor do tal personaxe con gafas negras, un impresentable dos que abundan entre nós. Un home que non ten pudor en mostrar o seu pensamento. Vale a pena lelo e miralo, observar ese humor que nos fai rir ou chorar (non sabemos ben) porque podemos recoñecer a realidade detrás das palabras e viñetas.

Así o presentan: "Perfecto Conde dixo: López á moi seu para non ser orixinal. 

López debuxa a Celestino. Ou Celestino debuxa a López. E ambos os dous debúxannos a nós. Para rirse de nós. Para iluminar-nos. Para deitar retranca e felicidade. Na mellor tradición do Castelao humorista. Unha proposta de
humor intelixente para persoas intelixentes. Como López. Como Celestino."

martes, 13 de setembro de 2022

Un de cada

 

De Baía:  Por tobos e tobeiras. Así o presentan..."Sabías que o raposo é un desastre, mentres que o teixugo é moi limpo e ata ten o seu propio baño? E que estes son os dous veciños que a miúdo comparten un tobo? Paréceche difícil de crer? Ven con nós botar unha ollada ao interior das cámaras misteriosas que se atopan ao pé de tocos e árbores caídas. Abriremos camiños subterráneos para visitar felices familias de coellos, veremos se cadra osos a durmir nas súas camas ou algúns armiños falcatrueiros. Esta enciclopedia de fermosas ilustracións que forma parte do libro ensinarache moitas cousas interesantes sobre o mundo animal; entre outras, o feito de que o oso pardo, aparentemente impoñente e temido, prefire manterse a unha distancia prudencial dun certo animalciño miúdo… A obra presentásenos con dúas ofertas distintas, mais complementarias, de achegamento de información: a) a tradicional, co formato dunha enciclopedia, que dá a coñecer algúns dos animais máis habituais nestes biótopos; b) un modelo de tobo, con páxinas troqueladas, no que os seus habitantes non informan de forma simpática e divertida o seu particular modo de vida." Eu, debo confesar que só vin o libro troquelado.


De Nova Galicia Edicións: Yared visita ao dentista. Para perderlle o medo, non?

De Aira: Píntame un camiño. Para colorear.

xoves, 8 de setembro de 2022

Novos libros de poesía

Dous libros de poesía e os dous do mesmo autor: Antonio García Teijeiro.

No xardín do poeta cunhas magníficas ilustracións de Víctor Rivas na colección Merlín de Xerais e De poemas e bolboretas con ilustracións de María Lires en Embora. O primeiro deles preséntase así: "As páxinas deste libro son a porta de entrada a un xardín de versos onde o autor, Antonio García Teijeiro, dialoga coa poesía do gran Federido García Lorca. Nese xardín marabilloso que é a obra de Lorca agroman estes poemas de formas varias e medidas diversas; poemas musicais, rítmicos, cheos de luz, lúdicos, críticos, brillantes e sobre todo vitais, pois son froito da conversa íntima entre dous poetas que aman a vida." Rivas crea, arredor desa poesía, un imaxinario propio que dá para unha exposición na que seres alados e acuáticos dialogan coas olas que lembran a arte xaponesa ou as nubes formadas dese mesmo material, debuxos case naturalistas e representación desa xente que non é xente, un surrealismo que crea elementos vexetais con conchas, peixes voadores.... Cando o ar e o auga se unen, cando as plumas e as escamas se saúdan, cando o artista recolle os e o mundo textual e icónico de Lorca estamos ante unha obra maior.

O segundo libro, é suma de dous temas queridos do poeta: as bolboretas e as pombas, a paz e a delicadeza, a tenrura e a beleza.  Un libro de formato grande e pastas duras con ilustracións a base de colaxes e estampacións. O poeta, de novo, homanaxea a outros poetas: Antonio Machado, Edward Lear, Manuel María, Celso Emilio Ferreiro, Federico García Lorca, Aquilino Iglesia Alvariño no apartado "As bolboretas visitan algúns poetas.

martes, 6 de setembro de 2022

Un libro de bocados matemáticos e un libro de emocións?

Bocados matemáticos de Paulo González Ogando publicado por Xerais en Básicos Ciencia. Leamos: "Unha mirada adestrada consegue identificar elementos xeométricos, numéricos, lóxicos ou estatísticos ao seu arredor en multitude de situacións. Desde a forma do balón de fútbol ata o número que nos asignaron no noso DNI, nestas páxinas explícanse exemplos variados de aplicacións das matemáticas. O autor, profesor de secundaria, nesta obra dá respostas, fomenta a curiosidade e persegue que se perda o medo a facer uso das matemáticas. No seu blog http://compaseregra.blogspot.com leva compartidas máis de duascentas construcións dinámicas elaboradas seguindo as normas clásicas da xeometría con regra e compás.

A divulgación científica faise cada dçia máis imprescindible, por iso agradecemos cada un dos libros que aparecen en galego. Achegar a ciencia a todos os públicos e facelo en galego é algo realmente marabilloso. 

Defectos monstruosos de Alberto Hontoria Maceín, ilustrado por Nuria Díaz e traducido por Blanca Ana Roig está publicado por Hércules Edicións na colección Nova Lecturas de Hércules

Así se presenta: "Milo odia case todo. É desobediente, irrespectuoso e está sempre enfadado. Un día, tras sufrir un accidente, comeza a percibir un fenómeno extraordinario: o mundo está repleto de monstros que seguen aos humanos alá onde van. Pero a xente non o sabe, pois só Milo os pode ver. Aos poucos, Milo irá dándose conta de que cada monstro se parece sospeitosamente á persoa á que acompaña…" Cada monstro representa un defecto: a ira, a envexa, a soberbia, a timidez... e todo o que se agacha detrás de cada un deles. Milo aprende moito, cambia e tenta axudar aos demais. Pode ser este un libro para o traballo coas emocións, un libro dun psicólogo, haberá que pensalo...

domingo, 4 de setembro de 2022

Banda deseñada para peques

Capitán Lentella. Aventura a todo gas de Jorge Campos aparece publicado en Merlín Cómics de Xerais.

Así se presenta: "Dende o planeta Lentellón, Lalo e Rufino, dous valentes viaxeiros espaciais, queren dar a volta ao universo. A súa primeira parada é a Terra, onde atoparán aventuras, amigos e unha malvada mosca que está a facer das súas agochada baixo a superficie. Como poderán vencela? Parece que o único xeito é espertando o gran poder que todo lentellón leva dentro." Confesa o autor que 25 anos máis tarde de comezar a debuxar e escribir esta historia decidiu publicala, porque é o seu cómic de vida. Contanolo o autor de Alter - nativo un libro sen texto que obtivo varios premios e moito recoñecemento.

Xa imaxinades que falando dun planeta no que só se cultivan lentella os gases están á orde do día, ata o pungto de ser o combustible máis usado, de utilizalo na defensa fronta a calquera perigo. Esta é a historia da vixe de Lalo Lentella e o gato Rufino Lentellón, dous personaxes con personalidades ben definidas que os converten en divertidos e sorprendentes. Tede que lelo!

Un produto imprescindible, pois a banda deseñada para a infancia segue a ser minoritaria.

venres, 2 de setembro de 2022

Un libro con premio

Por mor de cinco pizzas aos catro queixos de Xosé A. Neira Cruz obtivo o premio Carlos Mosteiro 2021. O libro aparece con ilustracións de Víctor Rivas, uns debuxos sinxelos, a dúas cores, e con todas as propiedades  correspondentes. Unha historia de ratos que viven ao lado dun restaurante humano do que aproveitan todo o que precisan, por iso, cando toca defender ao dono, fano con todas as da lei. Unha historia que semella un divertimento, porque no comezo dous ratiños primos propóñense un reto... de aí sae que un deles que é moi comillón ha de papar esas cinco pizzas, pero algo sucede... que vai dar lugar a toda unha trama que ocorre maioritariamente no mundo dos ratos. A verdade é que os humanos non saen moi ben parados (ata o di o autor). 

Este mesmo autor xa ganou este mesmo premio hai un par de anos, con O enigma do baúl pechado.