domingo, 27 de febreiro de 2022

Arredor de Rosalía

Despois do seu día, atopo, unha publicación de hai tempo que non coñecía, Rosalía cos rapaces. Trátase dunha escolma comentada por Filgueira Valverde e ilustrada por Alfredo González, publicada pola Consellería da Presidencia, Servicio Central de Publicaciones, D.L. en 1985.

Nunca é tarde para volver a unha publicación.  

Unha iniciativa que nos parece magnífica é o da Biblioteca Nacional e un grupo de biólogos e María do Cebreiro, realizando o herbario no que se recollen as plantas ás que fai referencia Rosalía na súa obra.

venres, 25 de febreiro de 2022

O I Premio Xuventude Crea de Novela Curta

 

Cando sangren os lobos de Adrián Gómez Ramos acadou o  I Premio Xuventude Crea de Novela Curta. Aparece, agora,  publicada na colección Fóra de xogo de Xerais. 

Da presentación editorial: "Hai un asasino solto polas rúas de Compostela e só dous irmáns distanciados tras a morte dos seus pais coñecen os segredos necesarios para detelo. Fernán e Xandre Malvís terán que superar as barreiras autoimpostas entre eles e aprender a confiar o un no outro mentres se enfrontan a un criminal que supera totalmente o raciocinio. Lobishomes, meigas e segredos de antigas familias crean un entramado que, de non ser resolto, porá en perigo as vidas de todos os habitantes da cidade. O tempo corre ata a seguinte lúa chea; cada nova noite pode supoñer unha vítima máis e, un só erro, a perda de todo aquilo que os irmáns consideran digno de protección."

Unha novela na que o realismo (a investigación dun asasinato por parte da policía) se mestura coa ficción (Haberá homes lobo? Mulleres lobas? Meigas que se agachan detrás dunha tenda pseudo esotérica? Gévaudans, acaso?). Na cidade de Compostela andan soltos seres que poden facer moito mal e outros que tentan evitalo. Unha loita entre o ben e o mal. Unha novela policíaca, un relato negro, uns novos licántropos soltos pola nosa xeografía...

Esta entrevista achega información sobre o autor.

martes, 22 de febreiro de 2022

A enfermidade: "As cicatrices do caranguexo"

As cicatrices do caranguexo de Irene Alonso Gasalla con ilustracións de Irene Sanjuán, publicdo na colección Merlín de Xerais.

Unha avoa é a narradora; ela conta a historia que se presenta así:"Saír sen danos dunha liorta co capitán Cancro non é tarefa doada. Cando menos levarás de recordo algunha cicatriz revirada e, de seguro, unha historia que contar. Como a que a avoa de Nico e Bruno lles relata aos seus netos, onde lembra a batalla que os pais dos nenos tiveron que librar contra tan temido personaxe. Unha historia con monstros arrepiantes e valentes piratas, loitas con feridas abertas e moitos aloumiños para pechalas. Un conto autobiográfico que aborda a enfermidade con tenrura e positivismo. "Ela conta esa historia, a dos pais dos nenos (daqueles que buscan tesouros e debuxan na area) que tiveron que pelexar co capitán Cancro que os secuestrouo". 

E... porque detrás de cada cicatriz hai unha fantástica aventura. Porque para loitar tes que vestirte de pirata co pano na cabeza, co parche no ollo, coa perna revirada. Porque sempre podes enviar mensaxes en botellas para informar de como vai a loita. Porque esa é unha viaxe complicada, coas augas bravas, as quenllas atacando, os ventos tumultuosos... pero as baleas e os golfiños están dispostos a axudar e así poderase chegar a illas marabillosas nas que as pílulas colgan como froitas das árbores... incluso hai monstros coma o Quimioteronte e a Radiotesaura que lles axudarán a vencer ao capitán Cancro. Igual tiñamos que organizarnos ben e ir dunha vez todos e todas xuntas a derrotar a Cancro, o maligno cangarexo.

venres, 18 de febreiro de 2022

Libro premiado no certame Agustín Fernández Paz pola Igualdade

A cidade do átomo de Iria Misa é o libro premiado no certame Agustín Fernández Paz pola Igualdade.

Da presentación editorial: "Tras a explosión no reactor 4 da planta nuclear de Chernóbil todo semella inerte na cidade do átomo. Desde a súa evacuación, Prípiat é unha cidade en ruínas que os pequenos e as pequenas, ante a ausencia de adultos, se afanan por manter en funcionamento. Todos agás Lena Petrova, diferente e solitaria, que non é quen de atopar o seu lugar entre as rúas e edificios baleiros. Non hai nin rastro da súa mellor amiga, Svetlana, e agarda con ansia o regreso da súa nai. Tan só o enigmático Máscara parece adaptarse tan mal coma ela á nova orde das cousas. Que segredo agochará? Unha estremecedora ficción historica ambientada na cidade fantasma"

Publicado na colección Merlín de Xerais con ilustracións de Sonia García. Esta entrevista coa autora, achega máis información sobre o libro. 

Unha atmosfera irreal, unha rapazada gobernándose, a soedade do abandono, a discriminación ao diferente, a educación soviética, os líderes da URSS, o perigo nuclear e a sorpresa final, iso que nunca esperamos e que aparece para darlle sentido á obra.

xoves, 17 de febreiro de 2022

Dous libros de Susana Peix

Miko un heroe con moita fame de Susana Peix e Julilustrador, Un lobo de conto da mesma autora con iustracións de Mercè Canals. Os dous publicados por Cumio Editorial, na colección Lemos +6. No primeiro deles coñecemos a un coala que a pesar das ganas que ten de comer as follas máis tenras dos eucaliptos, non dubida en salvar a dúas crías de paxaro que corren o risco de ser comidas por un dragón barbudo; despois, está tan canso que non dá subido á árbore para comer, pero a nai dos paxaros levaralle esas follas coas que recupera  a vida. Na presentación dise: "Axudar aos demais sen esperar nada a cambio é un sentimento positivo que nace do altruísmo. Hai un valor humano chamado empatía que nos ensina a nos pór no lugar dos demais e nos fai mellores persoas". Pois si, diso vai a historia.

O segundo, Un lobo de conto, aparece así presentado: "En tanto que os seus brincaban no bosque e aprendían a ser lobos, o pequeño lobeto sempre ficaba na cova. Encantáballe escoitar os contos que lle contaba a súa nai. Era una grande inventora de historias! Os seus irmáns pensaban que esas historias eran unha perda de tempo, até que un día o lobiño lles deu unha boa lección." Porque ouvear para chamar e que ninguén se perda ou contar contos tamén ten o seu valor. Da presentación recollemos: Ser diferente non é algo negativo, aínda que moitas veces o vivamos dese xeito por causa do noso medo. Todas as persoas somos diferentes e, moitas veces, esa diferenza é a que nos fai ser tan especiais.

Preparados para unha lectura doada e buscándolle os valores que os acompañan...

luns, 14 de febreiro de 2022

Dous álbumes cos afectos como núcleo temático

Na procura da illa do tesouro de Lizzy Stewart está publicado por Triqueta Verde. 

Así o presentan: "Matilda e o seu pai son MOI diferentes. Ela é rápida, el é lento. Matilda é metódica e el un pouquiño trapalleiro. Ela gosta do silencio e el é un tanto rebuldeiro.  Aínda así, deciden ir na procura dun tesouro agochado nunha illa perdida. Para iso seguen un mapa que Matilda ten, mais o seu pai, que é moi distraído, frustra continuamente os plans de Matilda. 

Serán capaces entre os dous de atopar o tesouro?" Un cambio de papeis, unha nena que semella máis responsable que un adulto que se vai despistando a cada instante, pero quérense moito e... ese tamén é un bo tesouro, porque cando se atopan a felicidade reaparece.  

O abrazo de Eoin Mclaughlin, publicado por Algar. Así o presentan: "Unha historia moi humana protagonizada por animais. Ourizo está triste. Tan triste, que só hai unha cousa que pode animalo: un abrazo. Mais ningún animal o quere abrazar. A Tartaruga pásalle exactamente o mesmo. Moucho vailles explicar que o problema é que Ourizo é aguzado de máis e Tartaruga osuda, demasiado osuda. Conseguirán o abrazo que tanto desexan? A tenrura deste libro vaite conquistar." 
Un libro ou dous libros porque se pode ler empezando por un lado ou polo outro (daquela terás que darlle a volta) e atoparanse compartindo as páxinas centrais. Unha boa historia cunha presentación diferente. Unha obra que semella pensada para estes tempos nos que todos necesitamos abrazos e todos os tememos pola proximidade dun virus.

xoves, 10 de febreiro de 2022

Varios álbums, varios varios

Pepiño Cebola (de Sandra Alonso con ilustracións de Álex Meléndez e Beatriz Dapena, publicado por La Maleta Ediciones) que se presenta así:"Pepiño é un neno, Cebola é só un adxectivo… Mil e unha capas de agarimo profesado por todos os que o coñecen fan que Pepiño non sexa un neno, senón unha “ cebola. Descubre o que acontece cando se libera das súas capas!" Moi correcto, o que non se pode dicir doutros.

Achist! de José Carlos Acedes e Laura Tora. Outra tradución. Neste caso asistimos á chegada á casa dun bebé que estornuda cando ve o gato, logo será o gato o que o faga cando o ve a el e... ao final, todo se amaña.

Imaxinando un mundo novo (para ti) de Paco Ortega, publicado por Triqueta Verde. Un mundo novo no que podas medrar sendo feliz. Unhas ilustracións magníficas que van cambiando o fondo das páxinas. Grandes desexos que nos lembran a cando Zuckerberg ou Bill Gates fixeron donacións coincidindo co nacementos dos seus fillos, coa declaración de que desexaban que o mundo que atoparan os pequenos, fose un pouco mellor. Así o di o autor: "Un mundo sen vencedores nin vencidos, sen fame e sen frío, sen natureza pintada de aceiro. (...) Construiríache un recunchiño nalgún lugar do firmamento onde te arrouparía cun conto e alumearía con miles de estrelas antes de irmos durmir (...) Un mundo máxico que construirás cos teus soños e onde eu estarei sempre coidando de ti."

domingo, 6 de febreiro de 2022

Unha serie: Filipo e Leo

 

Unha serie: Filipo e Leo de Adolfo Serra del Corral e Ester García Cortés, publicados por Edelvives

Da presentación editorial: "Filipo e Leo viven na fraga de Ara con outros animais. Malia seren moi distintos, son amigos inseparables. Encántalles compartir momentos especiais. Chegou a primavera. Leo está moi contento e convence a Filipo de pasaren un tranquilo día de pícnic. Pero o paseo non será, nin moito menos, como esperaban."

Un picnic tranquilo, Unha tarde de chuvia... A amizade como gran tema.


 

 

sábado, 5 de febreiro de 2022

Libros de tamaño grande

Ás veces atopamos libros cun tamaño que nos semella excesivo para o seu valor literario, incluso por veces tamén, para as ilustracións que acompañan o texto, por iso sempre animamos a pasar pola libraría a coñecer as novidades, a deterse na lectura de imaxes e texto e non deixarnos levar polo reclamo comercial ou polas dimensións.

Enyd e o bosque esquecido de María Quintana Silva, ilustrado por Silvia Álvarez e publicado por Triqueta Verde na colección "Camiñemos cara a un mundo verde". Porque no bosque están fartos do lixo que lles levan os humanos, o mapache decide comezar a protesta, vaino seguir Enyd e o sapo. Ao chegar á cidade, os veciños secúndanos. Ademais, vai arder o bosque e van traballar por recuperalo. 

Un texto que defende valores medio ambientais. Un libro con grandes ilustracións moi coloristas, realizadas a pastel, que non só enchen a páxina senón que nun caso se abren a ambos lados duplicándose e converténdose en doble páxina.  

Olivia e o clarinete máxico de Francisco Álvarez Koks con ilustracións de Emilio Baz e publicado por mr.momo.es en tres linguas (galego, castelán e inglés) cóntasenos a historia dunha nena que atopa o clarinete de seu avó nun baúl; decide tocalo e cando o fai nun concerto sente que todo se ilumina como nunha milagre.

A editorial Fervenza que nos tiña acostumadas ao teatro, está a publicar relatos ilustrados e álbumes. O porco Farruco de Margarita Fernández, ilustrado por Sabela Cadarso, con algunha rima que non se sitúa no final da liña e unha historia: a do porco namorado da veciña que pensa que non lle corresponde porque está pálido así que decide baixar á praia; ante a cantidade de dificultades que lle van xurdindo el repite:"Seguirei adiante con tal de coller cor  /  Ai, canto se fai por amor...!" Ilustracións dixitais moi evidentes.

Unha ponte para Najla. Construíndo unha ponte de amor entre os pobos de Maite Herrero Ameixeiras con ilustracións de Joseba Plazuelo. A avoa fala cos netos do Libro da vida, de que se pon triste ao ver os sirios fuxindo e acórdase de cando no 1939 un tío seu estivo nun campo de refuxiados francés "porque calquera persoa de calquera lugar se pode converter en refuxiado". Os netos coñecen unha nena siria que acabará indo á súa escola e usan camisetas que levan o lema Open the borders,o irmán ten un soño no que ve como os refuxiados dun lado do mundo se poden atopar no medio dunha ponte de luz cos do outro lado.




mércores, 2 de febreiro de 2022

De cando te volver SUPER

 Ver las imágenes de origen

Susana Sánches Aríns sacou do prelo, en Cuarto de inverno, SuperUlex, unha novela escrita en pequenos capítulos ao redor dunha rapaza que despois dun proceso de quimio adquire unha forza inusitada e con ela unha seguridade asombrosa. Está disposta a facer xustiza, e se Batman ten con el a Alfred, ela vese apoiada pola bisavoa. Ela é quen lle fai o traxe, quen a asesora, quen lle razoa e está sempre aí. Con ela formarán equipo tamén, aquelas rapazas e rapaces aos que vai salvando das gadoupas do terror, deses malos que sempre andan polo medio creando problemas. Coma anxos a bisa e a Susa (a tía), a primeira facendo de anxo malo vingativo se fai falla, Susa politicamente correcta coma un anxo bo, branquiño.

Clara está feita un mar de dúbidas, os seus sentidos moi desenvoltos, unha pel estremadamente sensible,unhas reaccións imprevisibles, unhas ansias de xustiza urxentes, unha tropa fandanga, unha bisavoa e un código ético. Non podedes perder esta oportuidade de entrar nunha historia realmente novidosa na escrita e no contido, na argumentación e na normativa. Nada vos defraudará!