Libros aos que acceder directamente

Eu quedo na casa, un conto de Ramón D. Veiga e Iván R para tempos de confinamento que atopamos en internet, igual que Eu quero saír, un conto de Quero saír!, un conto de Cova Díaz e Nico Ordozgoiti que atoparedes no padlet de GALIX

Trátase de dous libros, un deles da libraría e editora Aira, un cómic para peques titulado Carriandiola

Outro, é un libro que acaba de aparecer co selo de Cooperativa Cultural 7, en formato dixital e semella realizado directamente para ese soporte e estes tempos: Bravas. Científicas e artistas galegas da nosa historia

Unha banda deseñada, sempre tan necesarias, entre nós, e un libro sobre mulleres, situado entre Pioneiras e Mulleres bravas da nosa historia, un libro para reivindicar as mulleres galegas que sacaron a cabeza en tempos complicados.

Recursos da cidade para o tempo de estar na casa

Compostela queda na casa ofrece alternativas para estar no fogar.
Todos os recursos dispoñibles vinculados a programas do Departamento de Lingua do Concello de Santiago están na súa web: delingua.santiagodecompostela.gal. Actividades para horas de ocio como:
- ATOPANDO COMPOSTELA (atopando.santiagodecompostela.gal). Trátase dun xogo en liña para coñecer a riqueza que encerran os nomes de lugar mentres nos movemos virtualmente polo municipio compostelán. Para xogar en grupo ou individualmente, na casa ou a distancia.
- CONTO VIAXEIRO (contoviaxeiro.santiagodecompostela.gal). Libros dixitais escritos e ilustrados colectivamente dende as aulas dos centros de Santiago, historias en vídeo e máis propostas para facer na casa con nenos e nenas de primaria.
- ENREGUÉIFATE (enregueifate.gal). Destinado á mocidade, co obxectivo de encher a rede de regueifas e, ao mesmo tempo, preparar algunha para a convocatoria do certame deste ano. Tamén están os vídeos dos participantes en edicións anteriores. E para o profesorado que está a traballar co alumnado a distancia tamén se inclúen propostas didácticas.
- YOUTUBEIR@S (youtubeiras.gal). Creatividade audiovisual en estado puro e sen límite de idade. Os saberes, as ideas ou ocorrencias, as creacións musicais... teñen unha comunidade youtubeira en galego. Dende a páxina deste proxecto podedes ver o moito que deron de si as edicións anteriores e ir preparando, mesmo con consellos e titoriais, o material para concursar este ano.
- APEGO (apego.gal). Para as parellas que están agardando un bebé, propoñemos, que visitedes a páxina apego.gal. Nela atoparedes información sobre o ben que lles fai falarlles en galego aos vosos fillos e fillas en galego, dende o berce; e recursos para apoiar a crianza en galego, ademais de propostas de nomes. Os que xa son pais dun cativo ou cativa, a través da sección "recursos" poden atopar arrolos, recitados, xogos, etc. Unha porta aberta a un mundo de propostas, entre as que hai unha ampla selección de música, series, ou ligazóns a páxinas sobre recursos infantís. Todo está en apego.gal/outros-recursos. No apartado de descargas desta páxina pódese atopar unha chea de material para imprimir na casa e usar cos vosos nenos e nenas. Por exemplo, "De como se chaman" inclúe bits para aprender xogando os nomes das cousas do universo infantil e máis unha selección de animais que podemos atopar calquera día de paseo polo noso medio natural. E "Das cousas do tempo" contén os elementos para construír un almanaque diario, co que aprender números, nomes dos días, dos meses, das estacións, o tempo meteorolóxico..., e tamén un pasatempo para ir familiarizándose coas horas e os reloxos.
Departamento de Mocidade
Pola súa banda, o Departamento de Mocidade, a través dos seus perfís oficiais en redes sociais e os perfís do Centro Xove da Almáciga lanzou a iniciativa #CompostelaCreanaCasa para animar á mocidade creativa de Santiago a compartir o seu bo facer en música, poesía, ilustración, pintura; sempre cunha vocación lúdica e formativa. A acción leva en marcha dende o venres e xa acadou máis dunha decena de participacións.
As persoas interesadas en participar poden poñerse en contacto coa Concellería de Mocidade en Facebook , Twitter ou Instagram e enviar o seu vídeo a través de sistemas para compartir contidos como WeTransfer, Dropbox ou Google Drive.
O Centro Xove ofertará diferentes plans, contidos e mesmo cursos durante o estado de alarma. Ofrecen unha proposta diaria con luns culturais, martes de faladoiro, mércores de artes, xoves de encontro e venres en liña, cun curso de iniciación á guitarra incluído. A información sobre todas estas actividades pode consultarse na web centroxove.com, en concreto no apartado #euquedonacasa, pero non sen plan!.
Compostela Cultura
A Axenda C, de Compostela Cultura, difunde semanalmente distintas actividades para todas as idades e gustos. Propostas como Rede musical, con obradoiros e actuacións en directo de distintos artistas, entre as que se atopan gravacións da Real Filharmonía de Galicia e da Banda Municipal de Música de Santiago de Compostela. Ou como Ler en liña e liñas para ler, unha proposta a través da cal se pode acceder a Galicia le, a plataforma de préstamo de obras en formato electrónico, pertencente á Rede de Bibliotecas Públicas de Galicia, que permite ler sen saíres da casas.
Outra opción para pasar o tempo de ocio é Palabras en rede, na que se pode acceder a creacións narrativas e poéticas de distintos autores. Dende aquí tamén podes acceder ao salón virtual que puxo en marcha o Salón do Libro de Pontevedra, con contos, cantigas, obradoiros, malabares, kits de supervivencia poética, etc. E aos recursos de kalandraga.tv: contos contados e cantados, vídeos musicais, entrevistas con ilustradoras e ilustradores e animacións de libros.
Outras das iniciativas incluídas nesta proposta é o Festival Atlántica de Narración Oral, con contos para toda a familia dos que e pode gozar a través de Facebook ou Youtube. E os eventos que está a pendurar Hay festival, un dos socios do Auditorio de Galicia no proxecto Wom@rts. Cada día, a organización do certame pon en aberto conversas entre figuras destacadas da literatura mundial.
A cuarta proposta da Axenda C é Na punta do pé, un obradoiro de baile con perspectiva de xénero co que a xente de Ardelloeixo amosa distintos modos de bailar e de pensar o baile. Tamén a través desta canle, podemos atopar Un punto ao día con Luís Prego, unha serie de vídeos nos que este bailarín nos ensina puntos de baile galego, para que vaiamos practicando, o mesmo que outro bailarín, Antonio Prado.
E a quinta proposta vai de cinema. Novo cinema galego, o Arquivo das Novas Prácticas Cinematrográficas na Galicia, o colectivo Crea (Asociación Galega de Profesionais da Dirección e a Realización) e os organizadores da Mostra internacional de Cinema Galego que tiña que celebrarse esta semana, poñen a disposición das familias distintos filmes, así como arquivos con textos académicos e divulgativos sobre o sétimo arte, aos que se pode acceder a través do apartado E ti que ves? da Axenda C. A Axenda C conta cun boletín que informa da oferta cultural da cidade, e no que as persoas interesadas se poden suscribir.
Alguén que respira
O festival de poesía Alguén que respira, organizado polo Concello de Santiago, foi cancelado fisicamente, pero non virtualmente O completo programa de recitais pódese escoitar na web alguenquerespira.gal. Poesía contra a violencia, poesía contra o confinamento, poesía contra a intransixencia ou poesía de confinamento, na voz dos seus propios autores.
Área de Deportes
A empresa Xade, que xestiona o Multiúsos do Sar e o complexo deportivo de Santa Isabel, habilitou na súa web, multiusos.net, o apartado Euadestronacasa, no que as persoas deportistas poden atopar vídeos titoriais de clases en directo, e as familias poden manterse en forma sen saír da casa.

O terror tamén en aberto

Xuvenil e persoas adultas. Terror e misterio. Que só se acheguen os/as osados/as, porque xa o tempo trae terror abondo.

Así nos conta Urco a súa achega:

"Un pequeno gran de area para que todas pasemos estes tempos escuros o mellor posíbel. En colaboración co departamento de deseño de Sacauntos Cooperativa Gráfica decidimos ir “liberando” algúns dos nosos textos máis senlleiros en forma de ebooks de balde que podedes descargar desde o noso web.
Polo momento están dispoñíbeis os seguintes dous:
“A cidade sen nome”, de H.P. Lovecraft, publicado no volume 1 da nosa Biblioteca Lovecraft.
http://urcoeditora.com/titulos/a-chamada-de-cthulhu-e-outros-contos-de-terror-cosmico/
“A pedra negra”, de Robert E. Howard, publicado no volume Relatos de terror sobrenatural.
http://urcoeditora.com/titulos/relatos-de-terror-sobrenatural-segunda-edicion/
Prestade atención ás redes sociais, pois iremos publicando máis a medida que pasen os días.
Como non, todos eles están publicados baixo licenzas libres que permiten a súa difusión e lectura. Daquela xa sabedes, sentídevos libres de espallalos pola rede de redes!”

Finalistas Gala do Libro 2020. Iniciativa bibliográfica

Iniciativa bibliográfica















– Construtor da nación. Tomo I. 1886-1930, de Miguel Anxo Seixas Seoane (Editorial Galaxia/Consorcio de Santiago)
– Colección Pan de abella, VV. AA. (Apiario)
– Serie Animais Extraordinarios, de Xulio Gutiérrez e Nicolás Fernández (Faktoría K de libros)
O primeiro dos libros que forma parte da biografía de Castelao e que vai constar de varias entregas a pesar do "peso" real deste primeiro tomo. A biografía recollendo toda a documentación posible "para poder contestar a todas as preguntas que puidera facer súa nai" e tamén, diría eu, para dar por rematada a historia contada do creador da patria.Un empeño colosal por parte do autor, da editorial Galaxia e o Consorcio de Santiago.
A colección Pan de abella que forma parte da editorial Apiario xunto coas coleccións A abella mestra (centrada no que poderiamos chamar didáctica), Cera labrada (libros de poesía), Niño de abella (libro infantil)... Chuchamel (para obxectos) e este Pan de abella (para plaquettes). Estes produtos, igual que os de Cera labrada teñen unha edición e rematado magnífico.
A colección ou serie de Animais Extraordinarios da autoría do biólogo Xulio Gutiérrez e o ilustrador de natureza Nicolás Fernández publicado por Kalandraka, consta dos libros Bocas, Construtores, Nacer, Ocultos, Ollos e Viaxeiros. Libros imprescindibles para rapazada galega que ten un déficit inmenso de libros informativos destinados á infancia

Finalistas Gala do Libro. Libro ilustrado

Libro ilustrado

 – Irmá paxaro, de Tamara Andrés, ilustracións de María Montes (Cuarto de Inverno)
– Os camiños do vento, de Xavier Estévez, ilustracións de Xosé Cobas (Edicións Xerais de Galicia)
– Teño dereitos, de Miguel Robledo (Aira Editorial)

Tres libros situados na franxa de infantil so dous últimos e xuvenil o primeiro.

Repite nominación Irmá paxaro que xa aparecía nos finalistas de xuvenil.

En canto aos ilustradores e ilustradora, o máis veterano é Xosé Cobas que leva ilustrado máis de cincuenta títulos. Cun estilo moi característico nos que ao lado do lapis aparece a acuarela, a obra inacabada, o hiperrealismo, mestura de técnicas e estilos cuns elementos que se repiten da mesma forma que se recoñecen as súas obras polo uso de terminadas cores ou os ricos empastados dos fondos.

María Montes é un boa descuberta. Ela asina os retratos das autoras nos libros de Tamara e Antía Yáñez na editora Cuarto de inverno e as ilustracións do primeiro. Unhas ilustracións que acompañan moi ben os versos e lle achegan, tamén ese punto de misterio no papel en branco. Entre a LIXG só lle viramos anteriormente as ilustracións da reedición dun dos libros de María Victoria Moreno pero aínda non despregara todo o seu potencial, como fai agora.

Miguel Robledo é un ilustrador versátil que, neste caso, se centra en infantil entregando un produto de moita calidade. Se acudimos á súa páxina de blogspot atoparemos dende publicidade, carteis, postais ou libros entre os que podemos atopar fantasía, bd ou clásicos, sempre deixándolle o seu propio selo. 

 

Día Internacional do Libro Infantil, 2 de abril. Mensaxe e cartel

FAME DE PALABRAS

"A finais do mes de abril, ou a comezos de maio, no meu país reverdecen os arbustos. Ao pouco tempo, as crisálidas das bolboretas prenden neles. Locen coma boliñas de algodón, mais as eirugas devoran folla tras folla ata que os arbustos perden o seu verde por completo. Cando as bolboretas saen das súas crisálidas botan a voar; pero malia todo, os arbustos non quedan arruinados: dentro dun ano volverán agromar, e así unha e outra vez.
Esta é a imaxe dunha escritora, a imaxe dun poeta: os contos e os poemas aliméntanse deles, ríllanos, esgótanos... E cando xa están escritos, saen voando para acabaren nos libros, para aterraren nos oídos daqueles que os escoitan. E isto non deixa de repetirse nunca...
E que ocorre cos poemas e cos contos?
Coñezo un rapaz ao que operaron dos ollos. Logo da intervención tivo que estar dúas semanas deitado sobre o seu costado dereito; e despois, durante un mes máis, non puido ler. Non puido ler nada. Cando, tras un mes e medio de repouso, volveu coller un libro, tivo a sensación de estar arramplando coas palabras a eito dunha tarteira. Como se as comese, como se as comese de verdade.
E coñezo unha rapaza que agora é mestra, e que dixo: “Pobres daqueles nenos aos que os seus pais non lles lían libros!”
As palabras, nos poemas e nos contos, son alimento. Non son alimento para o corpo, porque ninguén podería encher o estómago con elas. Son alimento para o espírito e para a alma.
Cando alguén ten fame e sede, o seu estómago encóllese e sécaselle a boca. Busca encontrar cando menos un codeliño de pan, unha cunca de arroz, un peixe ou unha froita. Canta máis fame, tanto máis se lle estreita a mirada, ata que xa non ve máis ca un bocado ou un grolo que o deixarían farto.
Pero a fame de palabras non se presenta deste xeito, senón que toma forma de abatemento, de apatía, de arrogancia. A xente que sofre deste tipo de fame non é consciente de que na súa alma reina o frío, non se decata do que está a pasar a carón de si mesma e non se ve. Unha parte do mundo váiselle das mans sen sequera notalo.
Esta fame unicamente poden saciala os poemas e os contos.
Se nunca o fixemos, existe a esperanza de que poidamos acalmar este tipo de fame?
Si. Aquel mozo le, raro é o día en que non o fai. E a moza que é mestra le contos para o seu alumnado. Cada venres. Cada semana.
E se algunha vez lle esquece, son as nenas e os nenos quen llo lembran.
E a escritora? E o poeta? Ao ano seguinte, reverdecerán. E volverán roelos os contos e os poemas que logo, transformados en bolboretas, botarán a voar. Unha e outra vez."
Escrito por Peter Svetina (Eslovenia)
Ilustrado por Damijan Stepancic (Eslovenia)
Traducido por Héctor Cajaraville

Día da Arte Galega, 1 de abril

Cando a Real Academia Galega de Belas Artes adoptou o 1 de abril como Día da Arte Galega, aclaraba que se facía en lembranza de que nesa data do ano 1.188 se colocou o Pórtico da Gloria, tal como consta no epígrafe baixo os dinteis. O significado desta obra xunto co seu autor, o Mestre Mateo que tal como se comenta na páxina da RAGBA,na aquitectura,na escultura, na pintura e incluso na música.

Pois ben, dende o principio se lle comentou á Academia que se ben se entendía a razón, o día non era o máis axeitado para o traballo en educación (que é onde máis se visibilizan as efemérides) se temos en conta a proximidade do Día da Poesía (21 de marzo), o Día do Teatro (27 de marzo) e o Día do Libro Infantil (2 de abril). Na Mariña Luguesa, uns anos antes (quen dixo que o ensino non se adianta?) xa puxeran en marcha o Día da Arte Galega na Escola o 1 de xuño por ser a data de nacemento de Luís Seoane. Foi inútil...

Ata agora, os homenaxeados foron: Maestro Mateo (2015), Alfonso Daniel Rodríguez Castelao (2016), Maruja Mallo (2017), Alejandro de la Sota (2018) e Luís Seoane (2019). Correspondéndolle neste 2010 a Domindo de Andrade (Cee, 1639-Santiago de Compostela, 1712)

Acerca deste arquitecto galego de proxección universal, recollemos unhas notas da Galipedia: estudou na facultade de Artes da Universidade de Santiago de Compostela, en principio coa idea de facerse crego. No ano 1669 xa era aparellador maior da catedral e no 1676 foi nomeado mestre de obras do templo compostelán. Neste, é da súa autoría a Torre do Reloxo, o pórtico real da Quintana ou a capela do Pilar. Tamén traballou no convento de San Domingos de Bonaval, onde foi quen de executar a afamada escaleira de caracol debuxada por Palladio e Vignola e o claustro. Como mestre de obras municipal fixo a Casa da Parra e a, xa póstuma, Casa Conga. Na catedral de Lugo realizou a sala capitular e a sancristía e tamén traballou na catedral de Ourense.

Agora que a rapazada anda pola casa sen poder saír, igual era cousa de animalos a traballar esta figura buscando imaxes da Torre do Reloxo, Pórtico Real da Quintana, Casa da Parra e Casa da Conga para decatarse de como a praza da Quintana recolle unha parte fundamental da súa obra. Observar as ventanas da Casa da Parra para descubrir o motivo das guirlaldas de flores e froitos que rodean as ventanas, a modo de cornos da abundancia, que atoparemos noutros lugares da cidade; e tamén a grandiosa chimenea que coroa a casa.

Pero, quizás, o que máis lles vaia interesar sexa a triplo escaleira de caracol que -na actualidade- forma parte do Museo do Pobo Galego, unha escaleira que lembra as xeometrías imposibles de Escher.