Unha nova distopía (escrita por unha muller): "O cidadán perfecto"

O cidadán perfecto é unha novela de ciencia ficción, na que se desenvolve unha distopía." O cidadán perfecto" é un concurso de televisión que acostuman ver os habitantes de Biotrés, a cidade do Continente na que hai barrios que son case decorados para crear ambiente. Unha sociedade moi estratificada, na que debaixo dos membros de dereito do Biopoder están os membros do Consello ou conselleiros do Biopoder e, máis abaixo, o vulgo en xeral.  

O Xefe de Escrutinio da Autoridade Social vai recibindo aos escrutadores, especialmente aos xx pois tense demostrado que teñen máis facilidade que os xy. A sociedade vese, non só escrutada cando hai a mínima dúbida pairando sobre eles, senón programada de forma que a reprodución ou a crianza, as relacións entre a poboación ou os sentimentos e vocacións forman parte dun programa que non deixa nada fóra do seu dominio. Unha sociedade na que non se envellece, para iso realízanse operacións pero tamén se usan máscaras absolutamente axustadas coa imaxe do que fostes. Estabilizadores, inhaladores e inhibidores fan que non se sufra pero tampouco se goce. Non existirá dependencia pero tampouco amor e, sempre sempre, haberá que estar atentos aos que poden sabotear tanta felicidade, neste caso o movemento chámase Diferenza (fronte a tanta igualdade).

Corre o ano tres mil e pico, uns escrutadores vixían a outros e ás veces o xefe é quen tende as trampas facéndose pasar directamente por un disidente. Semella que son as mulleres, ás que retiran unha temporada para procrear, as que poñen en marcha a disidencia. Polo medio vanse contando as historias desa cidade no Continente, dos Confíns, das Illas... doutros mundos artellados doutras maneiras que se poden mesturar con este e provocar chispas, aínda que todo remata nun traspaso que semella decidido por cada un dos suicidas involuntarios que deixan as súas mensaxes de despedida, sen decatarse.    

Para cando o noso mundo semella xa unha distopía de desencontros e incapacidade de acordos que nos dignifiquen, ven Raquel Ricart a meternos medo con outro lobo que aínda pode ser máis fero.

Catálogo de Bolonia 2018

 

O catálogo "Libros Infantís e Xuvenís de Galicia 2018" que todos os anos elabora GALIX cos títulos publicados en Galicia no ano anterior, xa está disponñible na páxina.

Pódese descargar neste enlace, na páxina de recursos do blog de GÁLIX (http://www.galix.org). 

A ilustración de Victor Rivas cun guiño a Escarlatina - Esmeraldina, é unha boa porta de entrada a un ano de literatura infantil e xuvenil galega.

Mulleres dramaturgas

Antes de rematar este mes de marzo (Marzo de Mulleres) celebramos o día mundial do teatro, recoñecendo a labor das dramaturgas galegas que escriben para a infancia como Pura e Dora Vázquez, Anisia Miranda, Ana María Fernández,  Paula Carballeira,  Gloria Sánchez, An Alfaya, Chus Pereiro, Teresa González, Fina Casalderrey, Marilar Aleixandre, Carmen Domech, Magdalena de Rojas... 

Mulleres e poesía

Xa o dixo Fran Alonso en Poetízate, cando comezou con Rosalía e rematou cunha das poetas actuais: este é un país de poetas, de mulleres que escriben poesía.

Si, tamén pasa no mundo da poesía para a infancia. Lembremos a Pura e Dora Vázquez, Helena Villar, Anisia Miranda, María Victoria Moreno, Ana María Fernández,  Marilar Aleixandre, María Canosa, Yolanda Castaño, Gloria Sánchez, Marica Campo, Elvira Riveiro, ... e tantas outras

Premios a libros que buscan a igualdade

 

Neste momento, contamos con dous premios de literatura infantil que promoven a igualdade de rapazas e rapaces. Dous premios con cadanseu nome de autor e autora.

O primeiro convocado polo IESCHA (Instituto de Estudos Chairegos) e o concello de Vilalba coa colaboración de Xerais é o Premio Agustín Fernández Paz de narrativa infantil e xuvenil pola igualdade, que na súa primeira convocatoria foi acadado por María Reimóndez cunha novela que leva por título Fóra do normal.

O segundo, é o Premio Fina Casalderrey de Literatura Infantil pola Igualdade, As súas bases están no seguinte enlace. Convocado con motivo do 8 de marzo, emitirá o seu ditame o 25 de xuño. Un premio que recoñece á autora dun dos libros que forma parte da súa colección "Contos da igualdade" co título Xela volveuse vampira.

O feito de que na nosa literatura existen dous premios con esta finalidade fala da preocupación da sociedade por esta temática.

Coleccións de biografías de mulleres galegas

Neste momento, no campo do libro infantil galego tamén atopamos coleccións de biografías de mulleres destacables, nese intento por compensar as desigualdade ás que se enfrontan as nenas, a falta de referentes femininos, a escaseza de espellos nos que reflectirse, de modelos aos que tender.

As coleccións de biografías de mulleres destacables como “Mulleres bravas da nosa Historia” de Urco, leva publicados os libros de Maruja Mallo, Rosalía de Castro, Xulia Minguillón e María Victoria Moreno, todos eles ilustrados por Eva Agra pero de diferentes autorías (Elvira Riveiro, María Lado, María Reimóndez e Eli Ríos).

“Mulleres galegas” de Lela edicións é outra destas coleccións que recolle biografías Unha historia de amor. Pequena biografía de Mª Victoria Moreno e Meiga nova, metade anxo metade marisco.Pequena biografía de Maruja Mallo e se abre a outros campos non artísticos con Semente de igualdade, semente de liberdade. Pequena biografía de ErnestinaOtero e Un ronsel de ardora. Pequenabiografía de Ángeles Alvariño.

Ademais das coleccións, debemos citar un par de libros que son fundamentais neste ámbito como a Historia das mulleres galegas. Das marchas nómades á Marcha Mundial das Mulleres, de Pepe Carreiro publicado por Baía ou Pioneiras. Galegas que abrironcamiño de Anaír Rodríguez publicado por Edicións Xerais de Galicia.

Tamén corresponde lembrar as obras para infancia que se publicaron arredor de María Mariño cando se lle dedicaron as Letras Galegas: Cantiga da costureira poeta. María Mariño, A vida secreta de María Mariño, María Mariño. Unha serea en terra e A voz do lago.  Da mesma maneira, este ano asistiremos á publicación de varias biografías sobre a muller das Letras como a de María Victoria Moreno. A muller que durmía pouco e soñaba moito.    

Coleccións de LIXG pola igualdade

 

Aínda que non son da opinión de crear coleccións especiais de literatura infantil para traballar os valores, porque entendo que os valores van implícitos sempre nos textos literarios, sexans consientes ou non autores/as e lectorado, considero que é necesario facer visibles aquelas que existen día de hoxe.  

 “A igualdade conta” de Embora Edicións con títulos como A urna dos desexos,  Irina bailarina, O segredo de Flora, O país dos mandóns, Teño dúas casas e Canto te quero, profe.

Todos os títulos son da autoría de  Paloma Rodríguez e Cristina Justo, con ilustracións de Spela Trobc

“Contos da igualdade” de Baía Edicións cos títulos Xela volveuse vampira de Fina Casalderrey ilustrado por Noemí López,  Un día de treboada de María de Mata ilustrado por Mariana Riestra Alfombriña de Cristina F.  O meniño Nito. Entón, os homes choran ou non? e Nera, a ferreira de Imelda Barrio ilustrado por Andrés Meixide.
Descatalogada pero con títulos ben suxerentes (Azul e Rosa, Carlota e o príncipe azul e Roi quere ser mamá) é a colección Lila Lilaina de A Nosa Terra. Tres títulos escritos e debuxados por Ana Pillado Vega pensando en combater estereotipos sobre os roles da muller e o home. 

Para rematar, hai que citar camiños como o de Kalandraka que traduce e edita varios libros do que se dou en chamar na anterior edición española “A favor de las niñas” con títulos como Rosa caramelo, A historia dos bonobos con gafas, Artur e Clementina e Unha feliz catástrofe.