Superheroes na escola. Imos a primaria!

Superheroes na escola. Imos a primaria! de José Carlos Román e Leire Martín está traducido `por Iolanda Mato e publicado por Triqueta Verde. Un álbum ilustrado con letras maiúsculas que nos fala dese gran paso entre Infantil e Primaria e de como ese temor polo cambio se pode converter nunha aventura. 

Supergoleadora está preocupada porque lle dixeron na casa que para o próximo curso vai estar nunha escola nova, os compañeiros tampouco saben a razón desa mudanza pero Superprofe explícalles que ese novo lugar se vai chamar Primaria e toido o que van facer alí; fálalles das "materias", de como van ler e escribir, falar, facer operacións matemáticas (poara resolver os problemas da vida diaria xa que as matemáticas están en todas partes), de como aprenderán o que fixeron os antepasados e todo o que hai no planeta, de aprender a falar outros idiomas para comunicarse con outras culturas, de como van adestrar a mente e o corpo; van bailar, cantar, debuxar... Terán un patio novo máis grande e novo amigos, libros novos, mochilas máis grandes; ademais vanse ver nos días especiais que celebrarán todos xuntos e el acompañaraos o primeiro día á nova aula. En vez de medo, o que agora teñen é emoción e ganas de entrar xa nesa aventura que lles agarda. 

Rapaces e rapazas son superheroes, certamente, pero o profe tamén o é. É marabilloso ver o ben que lles sabe verder ese paso a primaria, todo o que van ganar cando medren e, sobre todo, ese acompañamento que se compromete a facer o primeiro día pero tamén ao longo do curso cada vez que se reúnan para festexar xuntos. Os papel de xénero ben traballados, a supergoleadora é unha nena e o superprofe de Infantil un home, para rachar estereotipos! Ademais, ten en conta a diversidade na pel da rapazada pero tamén nesa cadeira de rodas na que se conduce unha compañeira.

Nunha das ilustracións vese a celebración do Día do Libro e na estantería están este e outros libros da editorial. Unha chiscadela que sempre se agradece porque obriga á rapazada a fixarse. Tan alegres as imaxes que dan ganas de irse a ese mundo de superheroes e camiñar con eles.