Unha novela xuvenil, ópera prima dun ilustrador

O soño da serpe de Antonio Seijas (un ilustrador que conseguiu o Premio á Mellor Obra Nacional de Expocomic, gañador ao mellor guión na Feira do Cómic de Barcelona e Premio Castelao da Deputación da Coruña). 

A historia que se conta é a dunha moza de Redes, cunha estraña situación familiar (despois de perder a súa xemelga e a nai nun accidente e estar soa co pai que atravesa por unha etapa autodestrutiva). Na vida real está volvendo a Santiago para comezar o curso académico, pero nese mundo entra outra realidade con xente que é máis que xente e vén doutras realidades. Os pactos co demo, os mortos que acompañan nos soños; as serpes, os cans, as lobas e os osos que van máis alá da especie; linguas que xa non se falan; os xamáns, os nubeiros e as meigas; mulleres con pelo de lume e ollos de ceo...    

O encontro coa imaxe da irmá no espello. A lenda dos Mariño, nunha nova versión. A medida desigual do tempo. E, esa mirada atrás, aos tempos anteriores ao cristianismo e a tumba do apóstolo, cando a transcendencia estaba nos lugares que permanecerán. A novela ten unha magníficas descricións, especialmente de Compostela (...esa gran peza de granito feita cidade, co son atávico da gaita e esa corrente de sangue viva que é a xente na zona vella, no ritual repetido e sempre novo de peregrinos, turistas e estudantes na contorna do gran templo) e varias historias que se atravesan como calzadas para formar un plano, algunha delas da que quedamos moi prendidas e que fala de portas que deberían ser cruzadas para seguir lendo.  

Biblioteca escolar, viveiro de cidadanía

Este é o cartel de Óscar Villán para o lema, con todos os cadriños onde podemos observar como se cría e medra a cidadanía. Paso a paso, coaas horas debidas e as posibilidades ao pé de cada día.

Así o presentan desde a asesoría:

"Intervir na biblioteca escolar (nos seus espazos, nos seus tempos, nos seus recursos e actividades) ten consecuencias para o alumnado e para a comunidade educativa. Das características e dos enfoques desa intervención dependen os usos e as oportunidades que a biblioteca pode ofrecer. Cómpre unha reflexión sobre a distribución dos espazos, a organización dos tempos, a selección dos recursos e, moi especialmente, sobre o enfoque das actividades, co fin de que a biblioteca escolar poida facilitar o diálogo, a lectura crítica, a reflexión, o acceso ao coñecemento, o pensamento, a investigación, a experimentación, a creación, a comunicación, a adquisición de competencias útiles para a vida e para a convivencia, para o desenvolvemento académico e persoal, para unha participación activa nunha sociedade máis xusta e igualitaria". 

Xa está todo dito, agora é a tempo de actuar!

Poucas veces foi tan necesaria a cultura de paz e de responsabilidade, os deberes ao lado dos dereitos, a escoita sen buscar calar ao outro senón para complementalo, o común  por riba do propio e e defensa do mundo: do micro e o macro, da identidade e a empatía.

Como todos os anos dende 1967, o IBBY (International Board on Books for  Young People) promove a celebración do Día Internacional do Libro Infantil o 2 de  abril, conmemorando o nacemento de Hans Christian Andersen.
Como cada ano un país membro do IBBY é o encargado de patrocinar o Día e selecciona a un escritor ou escritora e a un ilustrador ou ilustradora para que redacten e confeccionen a mensaxe e o cartaz dirixidos a todos os nenos e nenas do mundo. Neste 2018, o país encargado é Letonia: a mensaxe é unha creación da escritora e editora Inese Zandere e o cartaz, do recoñecido ilustrador Reinis Petersons.
Aquí está o enlace ao cartaze e mensaxe para que participedes na celebración do Día Internacional do Libro Infantil. 
Descarga aquí o cartaz e o folleto / Descarga aquí os banners
Se pertences a unha biblioteca, libraría, colexio, etc. mira como adherirte aquí e descarga aquí as bases do concurso!
Na túa biblioteca non saben deste concurso? Anima a que participen enviándolles este enlace!

(Información completa no blog de GALIX)

Libro para quebrar cabezas

Quebracabezas de Diego Bianchi, publicado por Kalandraka no 2016 con tradución de Manuela Rodríguez. 

Un libro para ler, mirar, gozar e facer.

Di: ti e máis eu somos diferentes pero feitos de pó de estrelas e todos xuntos formamos parte do mundo. Unha mensaxe para lembrar. Igual que esa outra que nos anima a traballar con caixas: reaproveitalas, reciclalas, decoralas, agrupalas, formar figuras, debuxalas... creando quebracabezas aproveitando as diferentes aras. Un xogo e construción no que podemos ir deseñando letras para un alfabeto ou representando obxectos.  

Un libro moi creativo que nos obriga a seguir poñendo en práctica a nosa creatividade.

Libros que son clásicos infantís

Nese empeño que tanto levamos valorado en Kalandraka de traducir e reeditar libros que andaban descatalogados e custaba traballo conseguir, atopamos unha nova entrega: Míster Magnolia de Quentin Blake en tradución de X. Ballesteros.

Marabillosas ilustracións que ocupan toda a páxina se xuntan varias para presentarnos a este orixinal personaxe xogando cos números, porque a Míster Magnolia fáltalle 1 bota, ten 2 irmás frautistas, 3 batracios no estanque, 4 papagaios verdes,.. pero de vez en cando repítese a preocupación, porque a Míster Magnolia fáltalle unha bota, ata que ao final, cando chegamos a 10ten un agasallo: unha nova bota!   

Unhas ilustracións inconfundibles, coa alegría que o caracteriza ao servizo da infancia.

Un libro para caer polo universo

Caer de cu polo universo de Estíbaliz Espinosa, ilustracións de Lucía Cobo, publicado na colección Niño de abella de Apiario. O primeiro libro para a infancia desta poeta e o primeiro libro deste tipo publicado por esta editorial que abre colección. Un acerto.

Temos escoitado que algo estaba no cu do mundo, certo!

Tamén caemos de cu cando algo nos sorprende moito,e isto é o que lle sucede á nena que protagoniza esta historia, que cae de cun no universo e vai pasando por unha constelación, logo alucina ou máis ben aluniza na Lúa, pasa polo sol e a Vía Láctea e ata nos aclara a diferenza entre as estelas que tititilan e os planetas que brillaaaaan. Ao final aterra na Terra, no medio dun iglú así que terá que viaxar ata chegar baixo o ceo do río Miño.

Remata o libro coa posibilidade de enviarlle unha postal á astronauta, coa posiblidade de convidala a viaxar ás dunas de Marte, os aneis de Saturno... Só hai que escribir e recortar a postal e o selo.

Nótase o oficio de poeta da autora, nesta viaxe polo universo. Unha viaxe plena de coñecemento para divertirse contándoa e léndoa, para compartir mirando as páxinas e o ceo. Para caer de cu!    

Libros sobre libros

A meniña dos libros de Oliver Jeffers e Sam Winston, publicado por Patasdepeixe con tipografía de Óscar Villán e tradución de Laura Sáez e Saleta Fernández. Do mesmo autor, xa tiñan publicado o magnífico Perdido?

Un convite á lectura: "Eu son a meniña dos libros. Veño dun mundo de historias. Vou flotando sobre as ondas da miña imaxinación. Naveguei mares de palabras para preguntarte se queres vir comigo..." porque "Hai xente que esqueceu onde habito. Mais por entre estas palabras eu podo ensinarche o camiño"

De un en un ou de un en varios, teremos que seguir á meniña dos libros porque ela ofrécenos novas vidas que valen a pena ser vividas, novas xeografías da imaxinación para percorrer e novos tempos para habitar.

Moitas grazas temos que dar a estas pequenas editoriais que nos traen xoias como esta, libros que sen elas nunca teríamos nas mans. Ogallá poidan continuar co seu traballo e nos poidan seguir ofrecendo libros que son literatura e arte, álbumes ilustrados para gozar dos libros, das bibliotecas, das librarías, de nosos autores e ilustradores...