As bibliotecas son eses lugares nos que hai múltiples recursos para informarse, aprender, divertirse, encontrarse coa cultura, co patrimonio, con outros e outras... un porto seguro, todo o contrario a un non lugar. A biblioteca e as persoas que as atenden: bibliotecarios e bibliotecarias, con sempre amigas, quen traballa nas bibliotecas ama a cultura e a lectura, ten como misión divulgala, entregarlla aos demais en man, axudarlles a atopar o que buscan, axudarlles a mellorar... como Prometeo, entregan o lume sagrado e, coma el son castigados, cando os poderosos queren manternos na ignorancia.
Disto sabía moito Francisco Xavier Redondo Abad, o bibliotecario que investigou bibliotecarios/as (Bibliotecarias e bibliotecarios "infames". A depuración franquista do corpo bibliotecario republicano: o caso galego) e bibliotecas (A memoria dos libros. Incautación, espolio e desfeita da biblioteca de Santiago Casares Quiroga, O fulgor e as tebras. As bibliotecas na Galiza da II República e a súa destrución durante a Guerra Civil, Proceso a unha biblioteca. A persecución de Castelao a través da incautación da súa biblioteca) vítimas da represión. Dende que marchou ao Alén ese mundo está detido, quen vai continuar ese traballo de formiga documentalista que denuncia o horror que caeu sobre o libro, a biblioteca, o bibliotecario...
Por iso dende as bibliotecas escolares esta data se debía celebrar todo o mes, porque a escola pública é a que iguala e compensa, a que entrega en man todos os recursos para que a rapazada que non os ten na casa nin na familia non estea en desigualdade, para que con eles e elas se realicen accións positivas, igual que co noso idioma (e non teñamos medo á palabra discriminación porque cando é positiva non discrimina senón que compensa).
Aí vamos! coas bibliotecas e as persoas que as atenden, co profesorado e a cultura, coa lembtranza da boa xente á que non podemos esquecer dende as bibliotecas. Por ti, Francisco Redondo, por todo o que nos legastes!
